मुख्यमन्त्री बनेकै दिन भीम आचार्यलाई भातृशोक

सुनसरी- प्रदेश १ को मुख्यमन्त्री नियुक्त भएकै दिन भीम आचार्यलाई भातृ शोक परेको छ। सुनसरीको इनरुवा नगरपालिका-३ स्थित घरको कोठामा मुख्यमन्त्री आचार्यका कान्छा भाइ बिहीबार ५६ वर्षीय रामप्रसाद आचार्य मृत भेटिएका हुन्। 

भाइ रामप्रसाद घरमा मृत भेटिँदा दाजु भीम आचार्य भने विराटनगरमा मुख्यमन्त्रीको नियुक्ति लिने तरखरमा थिए। मुख्यमन्त्रीमा चयन हुँदै गर्दा आचार्यले भाइ मृत भेटिएको खबर पाएका हुन्। 

भाइको मृत्युको खबर पाए पश्चात हतारहतार शपथ ग्रहण सकेर मुख्यमन्त्री आचार्य भाइको अन्तिम संस्कारमा सहभागी हुन इनरुवा पुरेका थिए। मुख्यमन्त्री आचार्यले इनरुवा अस्पताल पुगेर भाइ रामप्रसादलाई श्रद्धाञ्जली दिएका थिए। 

मृतक रामप्रसाद भीम आचार्यका कान्छा भाई हुन्। मृतकका श्रीमती र दुई छोराछोरी छन्। मृतक आचार्यको आजै सुनसरी खोलामा दाहसंस्कार गरिएको छ। 

सो क्रममा प्रदेश एकका प्रमुख प्रतिपक्षी दलका नेता राजीव कोइरालालगायतको उपस्थिति थियो। आचार्यको मृत्यु विष सेवनबाट भएको बताइएको छ।