बल्खु र कालिमाटीमा छापा : १५ तरकारी व्यापारी कारवाहीमा 

काठमाडौं- वाणिज्य आपूर्ति तथा उपभोक्ता हित संरक्षण विभागको टोलीले बल्खु र कालिमाटी तरकारी बजारमा छापा मारेको छ।

छापाको क्रममा बल्खुमा ८ र कालिमाटीका ७ तरकारी व्यापारीलाई कारबाही गरिएको छ । तरकारीको भाउले आकाश छोएको गनासो बढेपछि विभागको टोलीले शुक्रबार बिहान अनुगमन गरेको हो ।

अनुगमनका क्रममा होलसेल बजारभित्रै बढी मूल्यमा बेच्ने बल्खुस्थित तरकारी बजारका ८ व्यापारीलाई कारवाही गरिएको छ । 

अनुगमनस्थलमै होलसेल व्यापारीलाई कारवाही गरेको यो पहिलो पटक हो। ८ व्यापारीलाई ५ देखि २० हजारसम्म जरिवाना गरेको छ ।

एक व्यापारीले लिएको तरकारी भित्रकै अर्को पसलमा बेच्दा ४०–५० रुपैंया नाफा राखेर बेचेको पाइए पछि कारवाही गरिएको वाणिज्य आपूर्ति तथा उपभोक्ता संरक्षण विभागका निर्देशक शोभाकर रेग्मीले बताए।

यसैगरी कालीमाटीस्थित तरकारी बजारमा पनि अनुगमन गरिएको छ। अनुगमनका क्रममा कालिमाटीका ७ तरकारी व्यवारीमाथि कारबाही गरिएको छ ।