विश्वकप छनोटमा नेपालले पहिलो खेल कुवेतसँग खेल्ने

काठमाडौं- एसियाको दोस्रो चरणको विश्वकप फुटबल छनोट अन्तरगत नेपालले आफ्नो पहिलो खेल कुवेतसँग खेल्ने भएको छ ।  सन् २०२२ मा कतारमा आयोजना हुने फिफा विश्वकप फुटबलका लागि नेपालले दोस्रो चरणको छनोटमा पहिलो खेल कुवेतसँग खेल्न लागेको हो । 

दोस्रो चरणको छनोटमा ४० टोलीले होम एण्ड अवेको आधारमा प्रतिस्पर्धा गर्ने छन् । जसलाई ८ समूहमा विभाजन गरिएको छ । फिफाले बुधबार सार्वजनिक गरेको ‘ड्र’ अनुसार समूह ‘बी’ मा रहेको नेपालले ५ सेप्टेम्बरमा कुवेतसँग घरेलु मैदानमा खेल्नेछ । 

नेपालले कुवेतसँग नोभेम्बर १९ मा अवे खेल खेल्नेछ । त्यस्तै नेपालले अष्ट्रेलियासँग अक्टोबर १० अवे खेल खेल्नेछ भने २०२० को मार्च ३१ मा घरेलु मैदानमा खेल्नेछ । अक्टोवर १५ मा घरेलु मैदानमा जोर्डनसँग खेल्दा सन् २०२० को जुन ४ गते उसैको मैदानमा अवे खेल खेल्नेछ ।

त्यस्तै नेपालले चाईनिज ताइपेसँग सेप्टेम्बर १० मा घरेलु मैदान र सन् २०२० को मार्च २६ मा अवे खेल खेल्नेछ । दोस्रो चरणको छनोटबाट ८ समूह विजेता र ४ उत्कृष्ट उपविजेता गरी १२ टोलीले एसियाको अन्तिम छनोटमा स्थान बनाउने छन् ।