शिक्षकको कुटाइबाट मृत्यु भएका किशोरको शव अस्पतालमै, बुबा वेहोस

धनगढी - शिक्षकको कुटाइबाट मृत्यु भएका कञ्चनपुरका १५ वर्षीय माधव कलौनीको शव छ दिन सम्म उठ्न सकेको छैन। भीमदत्त नगरपालिका–१७, मझगाउँस्थित महाकाली बाल विद्यालयमा अध्ययनरत माधवको गत मंगलबार राति उपचारका क्रममा भारतमा मृत्यु भएको थियो ।

कलौनीको शव महाकाली अञ्चल अस्पतालमा राखिएको छ। पोस्टमार्टम नगरिएकाले मृत्यु भएको ६ दिन बित्दा पनि आफन्तले दाहसंस्कार गर्न पाएका छैनन् ।  कलौनीको भारतको बरेलीस्थित राममूर्ति अस्पतालमा मृत्यु भएकोले सो अस्पतालको पोस्टमार्टमको रिपोर्ट नआएकाले यहाँ पोस्टमार्टम गर्न नसकिएको कञ्चनपुर जिल्ला प्रहरी कार्यालयका प्रमुख प्रहरी उपरीक्षक दिनेश आचार्यले बताए । 

भारतीय अस्पतालले पोस्टमार्टम रिपोर्टका लागि सात दिनदेखि १० दिन लाग्ने भनेपछि मृतका बुबा र एक प्रहरी सहितको टोली फर्किएको प्रहरीले जनाएको छ ।

यसैबीच विद्यालय व्यवस्थापन समिति अध्यक्ष र चारजना शिक्षकका नाममा परिवारले किटानी जाहेरी दिएका छन्। पाँचजनाविरुद्ध कर्तव्य ज्यान मुद्दा दर्ता भएर अदालतबाट सात दिनको म्याद थप गरिएको प्रहरी उपरीक्षक आचार्यले जानकारी दिए । 

अध्यक्ष निरञ्जनप्रसाद बोहरा, प्रधानाध्यापक यशोदा जोशी, शिक्षक दुर्गादत्त पाठक, लक्ष्मण भट्ट र हर्क जाग्रीविरुद्ध मुद्दा दर्ता भएको छ। पाँचैजना प्रहरी हिरासतमा छन्।

कक्षा ९ मा अध्ययनरत कलौनीलाई असार १३ गते चारजना शिक्षकले रुलर, लट्ठी, बुट र मुक्काले कार्यालयमै लगेर कुटपिट गरेको आफन्तले जनाएका छन्। कुटपिटबाट गम्भीर घाइते कलौनीलाई महाकाली अञ्चल अस्पताल र कोहलपुरसमेत लगेर उपचार गर्दा सुधार नभएपछि भारत लगिएको थियो । बैतडी घर भएका कलौनी मामा घरमा बसेर पढ्दै आएका थिए ।

सर्पले टोक्दा बुबा वेहोश

मृतकका बुबा वृहस्पति कलौनी सर्पले टोकेर वेहोश भएका छन्। शनिबार साँझ छोरा वियोगको शोक र दाहसंस्कार गर्न नपाएको चिन्तामा खाना नखाएर झोक्राइहेका उनलाई सर्पले टोकेपछि वेहोश भएका हुन्। खाना खानका लागि लुगा बदल्न जाँदा राति १० बजेतिर ढोकानेर सर्पले दायाँ खुट्टाको औंलामा टोकेको बुझिएको छ । उनको धनगढीस्थित माया मेट्रो अस्पतालमा उपचार भइरहेको छ।