६५ वर्ष पुगेकालाई ज्येष्ठ नागरिकको मान्यता दिन कांग्रेसको दबाव

 
काठमाडौं- प्रमुख प्रतिपक्ष दल नेपाली कांग्रेसले ६५ वर्ष पुगेका नागरिकलाई ज्येष्ठ नागरिकको मान्यता दिन सरकारलाई दबाव दिन सुरु गरेको छ।

नेपाली कांग्रेसकी सचेतक पुष्पा भुसालले ६५ वर्ष पुरा भएका नागरिकलाई ज्येष्ठ नागरिक तोक्न सरकारलाई दबाव दिएकी हुन्।

आइतबार संघीय संसदको महिला तथा सामाजिक समितिको बैठकमा ‘ज्येष्ठ नागरिक सम्बन्धी विधेयक’ माथिको छलफलमा भाग लिँदै उनले ज्येष्ठ नागरिकको उमेर ७० वर्ष नै राख्नुपर्ने सरकारको प्रस्तावमा पुनर्विचार गर्नुपर्ने पार्टीको पूरानै अडान दोहोर्याईन्। 

सचेतक भुसालले भूगोललाई हेरेर पनि सरकारले ६५ वर्ष उमेर पूरा गरेका नागरिकलाई ज्येष्ठ नागरिकको मान्यता दिई सेवा, सुविधा उपलब्ध गराउनुपर्ने तर्क गरिन्। उनले विधेयकमा ‘अति ज्येष्ठ नागरिक’ भन्ने प्रावधान राखिएकोमा पनि आपत्ति जनाईन्। ज्येष्ठ नागरिकहरुलाई वर्गीकरण गर्न नहुने उनको भनाई थियो।

सत्तारुढ नेकपाकी सांसद विनुकुमारी श्रेष्ठले पनि ज्येष्ठ नागरिकहरुलाई वर्गीकरण गर्ने काम नगर्न सरकारको गम्भिर ध्यानाकर्षण गराईन्। उनले ८० वर्ष पूरा भएका नागरिकलाई विशेष सुविधाको व्यवस्था गर्न हुने तर ज्येष्ठ नागरिकहरुमाथि नै विभेद हुने गरी अति ज्येष्ठ नागरिक भन्ने प्रावधान भने राख्न नहुने स्पष्ट पारिन्।

सरकारले समितिमा पेश गरेको विधेयकमा ८० वर्ष पूरा भएका ज्येष्ठ नागरिकलाई अति ज्येष्ठ नागरिकको मान्यता दिने प्रावधान राखिएको छ। त्यसप्रति सत्तारुढ नेकपाकै सांसद श्रेष्ठको असहमति छ।