अझै भारी वर्षा हुने : हवाई तथा सडक यातायात अवरुद्ध हुने चेतावनी

काठमाडौं- २/३ दिन यता लगातार परिरहेको वर्षा अझै दुई दिन पर्ने भएको छ । बिहीबार र शुक्रबार अझै भारी वर्षा हुने मौसमविद्हरुले जनाएका छन् । 

मनसुनी न्यूनचापीय रेखा नेपाल नजिकै रहेकाले मध्य र पूर्वका केही तथा पश्चिमको धेरैजसो ठाउँमा भारी वर्षा हुने मौसम पूर्वानुमान महाशाखाले जनाएको छ । 

महाशाखाका मौसमविद् समिर श्रेष्ठले मनसुन सक्रिय भएकाले अबको तीन दिन देशभरीको मौसम पूर्ण रुपमा नखुल्ने र केही ठाउँमा भारी वर्षा हुने संभावना रहेको जानकारी दिए ।  उनका अनुसार बिहीबार र शुक्रबार अझै धेरै पानी पर्ने छ ।

लगातारको वर्षासँगै बाढी र पहिरो जोखिम उच्च भएको भन्दै पूर्वतयारी गर्न र  सतर्कता अपनाउन मौसमविद्हरुले अपिल गरेका छन् । आज चुरे क्षेत्रका खोलामा बाढी पूर्वानुमान महाशाखाले जनाएको छ । 

विशेषगरी तराई, सिवालिक र मध्य पहाडी क्षेत्रमा आगामी २०/३६ घण्टासम्म भारी वर्षा हुने अनुमान छ । जसका कारण नदी तथा खोलाहरुमा ठूलो बाढी आउने महाशाखाले जनाएको छ । 

चुरे क्षेत्रसँगै बिहीबार बेलुकीपछि पूर्वी क्षेत्रमा कन्काई, कोशी, कमला, बागमती नदिमा खतराको तहभन्दा माथि पुग्ने चेतावनीसमेत दिइएको छ ।

भारी वर्षाका कारण हवाई तथा सडक यातायातमा समेत अवरोध आउन सक्ने भएकाले सतर्क रहन अपिल गरेको छ।

महाशाखाले जारी गरेको विशेष बुलेटिनमा भनिएकाे छ- देशभर मनसुनी वर्षा जारी रहने देखिन्छ। साथै देशको पश्चिमि भेगका एक/दुई स्थानहरुमा र मध्य र पूर्वी नेपालका थोरै स्थानहरुमा भारि वर्षाको संभावना भएकोले ती क्षेत्रका नदिहरुमा जलको वहाव, स्तर वढन सक्ने र पहाडि क्षेत्रहरुमा पहिरोहरुको जोखिम बढ्न सक्ने भएकोले उच्च सतर्कता अपनाउनुपर्ने देखिन्छ। साथै, हवाई तथा सडक यातायातमा समेत अवरोध आउन सक्नेछ।