तुइन घटना छानबिन गर्न गठित समितिको म्याद १५ दिन थप

काठमाडौं- सरकारले तुइन घटनाको छानबिन गर्न गठित समितिको म्याद १५ दिन थप गर्ने भएको निर्णय गरेको छ। 

साउन १५ गते दार्चुलाको व्यास गाउँपालिका २ मालाघाटस्थित महाकालीबाट तुइन तरेर भारतको गस्कु जाने क्रममा एसएसबीले लठ्ठा फुस्काएपछि ३३ वर्षीय जय सिंह धामी बेपत्ता भएका थिए। उक्त घटनाको अध्ययनका लागि सरकारले साउन १७ गते गृह मन्त्रालयका सहसचिव जनार्दन गौतमको संयोजकत्वमा ५ सदस्यीय छानबिन समिति बनाएको थियो।

समितिलाई घटना अध्ययनका लागि १० दिन समय तोकिएको थियो। सरकारले १० दिन भित्र सत्यतथ्य पत्ता लगाइ राय सुझावसहितको प्रतिवेदन पेस गर्न समितिलाई निर्देशन दिएको थियो।

तर, समितिले तोकिएको समयमा प्रतिवेदन पेस गर्न नसकेपछि गृह मन्त्री बालकृष्ण खाँणले साउन २५ गते पहिलो पटक एक साताको म्याद बढाएका थिए। पहिलो पटक थपिएको अवधिमा पनि काम नसकिएपछि दोस्रो पटक मंगलबार थप एक साता म्याद थप गरिएको छ।

छानबिन समितिले अझै सत्यतथ्य बाहिर ल्याउन सकेको छैन। उता महाकालीमा बेपत्ता धामी अझै फेला पर्न सकेका छैनन्।