ओली पक्ष पाखा लाग्यो, हामी क्रान्तिकारी कित्तातर्फ अघि बढ्यौं : माधव नेपाल

काठमाडौं– नेकपा (एकीकृत समाजवादी) का अध्यक्ष माधवकुमार नेपालले एमालेबाट निष्कासित भइसकेपछि केपी ओलीसँग घुँडा टेक्न नचाहेर नयाँ पार्टी दर्ता प्रक्रियामा लागेको बताएका छन्। 

चन्द्रागिरी रिसोर्टमा नेकपा (एकीकृत समाजवादी) को केन्द्रीय समिति बैठकपछि मंगलबार आयोजित पत्रकार सम्मेलनमा उनले  भने, ‘हामीसँग कि ओलीसँग घुँडा टेकेर बस्नुपर्ने या त क्रान्तिकारी पार्टी गठन गर्ने भन्ने दुई विकल्प रहेकाले दोस्रो विकल्प रोजेका हौं।’ उनले अब कम्युनिस्ट पार्टीमा दुई कित्ता स्पष्ट देखिएको बताए। उनले भने, ‘केपीको कित्ता एकातिर पाखा लागेको छ र हामी क्रान्तिकारी कित्तातिर अघि बढेका छौं।’

नेता नेपालले ओलीबाट आफूहरूलाई घर न घाटको बनाउने षड्यन्त्र भइरहेको आरोप लगाए। उनले भने, ‘हामीलाई सबै आन्दोलनबाट विमुख बनाउने काम भइरहेको छ। हामी यसलाई चिरेर अघि बढ्नेछौं।’ 

अष्टलक्ष्मी शाक्य मेरै चाहना र सुझावअनुसार मुख्यमन्त्रीमा जानुभएको हो। तर उहाँ पनि अप्ठ्यारोमा हुनुहुन्छ’। पार्टी दर्ता भएको २१ दिनभित्र उहाँहरूलाई पार्टी रोज्ने अधिकार हुन्छ, त्यो समयभित्र कता रोज्नुहुन्छ। उहाँमाथि भर पर्नुपर्ने कुरा हो।

अध्यक्ष नेपालले अब पार्टीले अन्य वामपन्थी दलसँग एकता गर्दै अघि बढ्ने बताए। उनले भने, ‘वामपन्थी दलसँग चुनावी एकता पनि हुन सक्छ।’ उनले  राष्ट्रियताको संरक्षण, भ्रष्टाचार नियन्त्रण र जनताका समस्या समाधान गर्न आफूहरू केन्द्रित हुने बताए।

अध्यक्ष नेपालले पार्टीलाई वैज्ञानिक समाजवादका आधारमा अगाडि बढाउने र कम्युनिस्ट आन्दोलनलाई थप उचाइमा लगिने बताए। उनले भने, ‘समाजमा रहेका विभेद अन्त्य गर्ने दिशामा पार्टी अग्रसर हुनेछ। उनले नयाँ पार्टी गठन निजी लडाइँ, पदको लडाइँ र स्वार्थको लडाइँ नभएर विचारको लडाइँ रहेको स्पष्ट पारे।

पार्टीको नाम पाउन कठिन भएकाले नेकपा एकीकृत समाजवादी राखिएको उनको भनाइ छ। उनले भने, ‘कम्युनिस्ट पार्टीको नाम पाउन कठिन छ। नेकपा राख्दा अदालतले मान्यता नदिएको थाहा पाइहाल्नुभयो।’