कीर्तिमानीबाट चुकेको बार्सिलोना

एजेन्सी- स्पेनिस ला लिगा च्याम्पियन क्लब बार्सिलोना कीर्तिमानी रच्नबाट चुकेको छ । शनिबार रती भएको स्पेनिस कोपा डेल रेको उपाधि भिड्न्तमा भ्यालेन्सियासँग पराजित भएपछि बार्सिलोना कीर्तिमानी रच्नबाट चुकेको हो । 

यसअघि लगातार ४ पटक स्पेनिस कोपा डेल रेको उपाधि जितेको बार्सिलोना भ्यालेन्सियालाई पराजित गर्दै लगातार ५ पटक उपाधि जित्दै क्लबको नयाँ कीर्तिमान रच्ने दाउमा थियो । तर, बार्सिलोनाले भ्यालेन्सियासँग जित निकाल्न नसक्दा कीर्तिमान अधुरै रहेको हो । कोपा डेल रेको उपाधि रियल मड्रिड र एथ्लेटिको बिल्बाओले पनि लगातार ४ पटक जितेका छन् । 

उपाधि भिडन्तमा बार्सिलोना भ्यालेन्सियासँग २-१ ले पराजित भएको हो । पहिलो हाफमा २-० ले पछि परेको बार्सिलोनाले दोस्रो हाफमा भने १ गोल मात्र फर्काएको थियो । खेलको २१ औं मिनेटमा केभिन गेमिरोको गोलबाट भ्यालेन्सियाले सुरुवाती अग्रता लिएको थियो । 

त्यस्तै ३३ औं मिनेटमा रोड्रिगोले गोल गर्दै भ्यालेन्सियालाई पहिलो हाफमा २-० को अग्रता दिलाएका थिए । ७३ औ मिनेटमा बार्सिलोनाका कप्तान लियोनल मेस्सीले गोल गर्दै खेलमा फर्काउने प्रयास गरे । तर, थप गाल गर्न नसक्दा बार्सिलोना सिजनको उपाधिसँग कीर्तिमान रच्नबाट चुकेको हो । 

बार्सिलोनाले स्पेनिस कोपा डेल रेको उपाधि सर्वाधिक ३० पटक पजतेको छ भने एथ्लेटिको बिल्बाओले २३ र रियल मड्रिडले १९ पटक उपाधि जितेका छन्। यता उपाधि विजेता भ्यालेन्सियाले ८ पटक स्पेनिस कोपा डेल रेको उपाधि जितेको छ ।