प्रदेश ३ माथि एपीएफको सानदार जित

काठमाडौं- तेस्रो संस्करणको प्रधानमन्त्री कप एकदिवसीय क्रिकेट प्रतियोगितामा विभागीय टिम एपीएफले विजयी सुरुवात गरेको छ । शनिबार टियु मैदानमा भएको खेलमा प्रदेश ३ लाई ४१ रनले पराजित गर्दै विजयी सुरुवात गरेको हो । 

एपीएफले दिएको २ सय ८९ रनको लक्ष्य पछ्याएको प्रदेश ३ ले निर्धारित ५० ओभरमा ९ विकेट गुमाएर मात्र २ सय ४७ रन बनाउन सक्यो । प्रदेश ३ का लागि उपकप्तान ज्ञानेन्द्र मल्लको शतक प्रहार गरेपनि टोलीलाई जित दिलाउन भने सकेनन् । मल्लले १११ बलको सामना गर्दै ८ चौका र ५ छक्का प्रहार गर्दै १ सय १७ रन जोडेका थिए । 

त्यस्तै कप्तान पारस खड्का अर्धशतक बनाउनबाट मात्र ४ रनले चुके । उनले ४५ बलमा ४ चौका र २ छक्का पहार गर्दै ४६ रनको योगदान दिएका थिए । त्यस्तै ओपनर रित गौतमले २७, सोनु देबकोटाले १५ र ईशान पाण्डेले १२ रन बनाउनु बाहेक अन्यले दोहरो अंकमा रन छुन सकेनन् । एपीएफका लागि कमल सिंह ऐरीले तीन विकेट लिँदा अविनास बोहराले दुई तथा पृथु बास्कोटा र भुवन कार्कीले एक एक विकेट लिए । 

यसअघि टस जितेर पहिले ब्याटिङ गर्ने निर्णय गरेको एपीएफले ५० ओभर ९ विकेट गुमाएर २ सय ८८ रन बनाएको थियो । एपीएफका लागि सुमित महर्जन र कप्तान पृथु बास्कोटाले अर्धशतकीय पारी खेलेका थिए । एपीएफका लागि सुमितले ९४ रनको योगदान दिएका थिए । 

उनले १०३ बलको सामना गर्दै ५ चौका र ६ छक्का प्रहार गरेका थिए । पृथुले ५८ बलको सामना गर्दै ३ चौका र १ छक्कासहित ५९ रन जोडे । यस्तै प्रदीप सिंह ऐरीले ४० रन जोड्दा अमर सिंह रौटेलाले अविजित २७ रन बनाए । प्रदेश ३ का लागि नन्दन कुमार यादव र जितेन्द्र ठकुरीले ३-३ तथा पारस खड्का र सुर्य यादवले एक एक विकेट लिए ।