अष्ट्रेलियाले पुनः कीर्तिमानी रच्ला?

एजेन्सी- पाँच पटक एकदिवसीय विश्वकपको उपाधि जितेको अष्ट्रेलिया इंग्ल्यान्डमा हुने विश्वकपमा पुनः जित निकाल्दै कीर्तिमान रच्न चाहन्छ । विश्वकपमा ११ औं संस्करण सम्पन्न भैसक्दा अष्ट्रेलियाले पाँच, भारत र वेस्टइन्डिज समान दुई-दुई तथा पाकिस्तान र श्रीलंकाले एक-एक पटक उपाधि जितेका छन् । 

पछिल्ला १० एकदिवसीय सिरिजमा ४ सरिज मात्र जिते पनि अष्ट्रेलियाको प्रदर्शन उच्च रहने अनुमान गरिएको छ । किनकी पछिल्लो पाकिस्तानसँगको ५ खेलको सिरिजका कैयौ खेलमा दुबै टोलीले ३४० रन भन्दा बढी बनाएका छन् । 

त्यसैले यस पटक इंग्ल्यान्डको मैदानमा धेरैजसो ब्याट्सम्यानले विस्फोटक पारी खेल्ने अनुमान गरिएको छ । यस पटक विश्वच्याम्पियन अष्ट्रेलियाले बनाएको सर्वाधिक रनको कीर्तिमानी पनि बे्रक हुन आँकलन गरिएको छ । 

विश्वकपमा सर्वाधिक स्कोर बनाउने कीर्तिमानी अष्ट्रेलिया टिमको नाममा छ । सन् २०१५ को विश्वकपमा अफगानिस्तानविरुद्धको खेलमा अष्ट्रेलियाले ६ विकेट गुमाएर ४१७ रन बनाएको थियो । उक्त खेलमा डेविड वार्नरले १७८, स्टीव स्मिथले ९५, ग्लेन म्याक्सवेलले ८८ रन जोडेका थिए । जवाफमा ब्याटिङ गरेको अफगानिस्तानले ३७.३ ओभरमा सबै विकेट गुमाउँदै मात्र १४२ रन जोडेको थियो । 

विश्वकपमा चार पटक ४०० रन पार

विश्वकपको एक खेलमा ४०० भन्दा बढी रनको योगफल चार पटक बनेको छ । यस लिस्टमा पहिलो नम्बरमा अष्ट्रेलिया छ भने दोस्रो स्थानमा भारत छ । भारतले २००७ को विश्वकपमा बरमुडाविरुद्ध ५ विकेट गुमाएर ४१३ रन जोडेको थियो । उक्त खेलमा विरेन्द्र सहवागले ८७ बलमा ११४ रन जोडेका थिए । जवाफमा बरमुडाले ४३.१ ओभरमा सबै विकेट गुमाएर मात्र १५६ रन जोडेको थियो । 

दक्षिण अफ्रीकाले विश्वकपको उपाधि जित्न सकेको छैन् । तर, उसले ४०० भन्दा बढी रनको आँकडा पुरा गरेको छ । २०१५ को विश्वकपमा आयरल्यान्डविरुद्ध दक्षिण अफ्रीकाले ४ विकेट गुमाएर ४११ रन बनाएको थियो । यो विश्वकपको इतिहासमा ४०० रन पुरा गर्ने तेस्रो टोली हो । यस खेलमा ओपनर हाशिम अमलाले १२८ बलमा १५९ रन जोडेका थिए । त्यस्तै फाफ डुप्लेसिले १०९ रनको योगदान दिएका थिए । जवाफी ब्याटिङ गरेको आयरल्यान्डले ४५ ओभरमा सबै विकेट गुमाएर २१० रन बनाएको थियो । 

पछिल्लो विश्वकपमा नै दक्षिण अफ्रीकाले वेस्टइन्डिजविरुद्ध ५ विकेट गुमएर ४०८ रन जोडेको थियो । यस खेलमा कप्तान एबी डीविलियर्सले ६६ बलमा १६२ रन जोडेका थिए । जवाफमा वेस्टइन्डिजले ३३.१ ओभरमा १५१ रन मात्र जोड्न सक्यो । 

श्रीलंका र न्युजल्यान्डको टिम पनि कम छैन

विश्वकपको कुनै एक खेलमा सर्वाधिक रन बनाउने मामिलामा श्रीलंका र न्युजल्यान्डका टिम पनि अब्बल रहेका देखिन्छन् ।  श्रीलंकाले १९९६ को विश्वकपमा केन्याविरुद्ध ५ विकेट गुमाएर ३९८ रन बनाएको थियो । श्रीलंकाका लागि अरविन्द डी सिल्वाले ११५ बलमा सर्वाधिक १४५ रन जोडेका थिए । जवाफमा केन्याले ७ विकेट गुमएर २५४ रन बनाउन सकेको थियो ।