भारतीय मेरी कोमसँग माला पराजित

गुवाहाटी- भारतको गुवाहाटीमा सोमबारदेखि सुरु भएको दोस्रो संस्करणको इन्डियन ओपन अन्तर्राष्ट्रिय बक्सिङ प्रतियोगितामा छ पटककी विश्वविजेता एमसी मेरी कोमसँग नेपालकी माला राई पराजित भएकी छन् । 

मंगलबार भएको ५१ केजी तौल समूहअन्तर्गत माला इन्डिया ‘सी’की मेरीसँग युनिनमस नतिजाको आधारमा पराजित भइन् । उनी ५-० अंकले पराजित भएकी हुन् । 

मेरी अघिल्लो संस्करणकी स्वर्ण विजेता पनि हुन् । इन्डियन बक्सिङ फेडेरेसनले आयोजना गरेको प्रतियोगितामा ११ जना नेपाली खेलाडीले भाग लिएका छन् । 

जसमध्य चारजना खेलाडी प्रतियोगिताबाट बाहिरिसकेका छन् । मंगलबार नै हुने अन्य खेलहरुमा नेपालकी पुनम रावल र मिना गुरुङले प्रतिस्पर्धा गर्ने छन् ।