प्रथम मेयर कप उमेर समूह बुद्धिचाल जेठ पहिलो साता

काठमाडौं - २४ औँ महानगर दिवस प्रथम मेयर कप उमेर समूह बुद्धिचाल प्रतियोगिता जेठ पहिलो साताबाट सुरु हुने भएको छ। काठमाडौं महानगर पालिका वाडा नं. २४ द्वारा आयोजित यु-१२ तथा यु-१६ बुद्धिचाल प्रतियोगिता जेठ पहिलो साता हुने आयोजकले एक पत्रकार सम्मेलन कार्यक्रमको आयोजना गर्दै जानकारी दिएको हो।

जेठ ३, ४, र ५ गते गरि तीन दिन सम्म चल्ने प्रतियोगितामा १५० भन्दा बढी खेलाडीको सहभागिता रहने विश्वास रहेको आयोजकले बताए। तिन समुहमा संचालन हुने प्रतियोगितामा खेलाडीले यु-१२ छात्रा र छात्र तथा यु-१६ छात्र रछात्रा खुल्लामा प्रतिस्पर्धा गर्ने छन्। 

कुल अनुमानित लागत ४ लाख ५७ हजार ५ सय खर्च लाग्ने प्रतियोगिताको तीन वटै समूहको विजेताले समान ३० हजार प्राप्त गर्ने छन्। त्यस्तै तिनै समुहको उपविजेता र तेश्रो हुनेले क्रमश: १५ हजार र १० हजार प्राप्त गर्ने छन्। तिनै समुहमा उत्कृष्ट हुने खेलाडीले ५ हजार रुपैयाँ प्राप्त गर्ने छन्। 

प्रतियोगिता संचालनका लागि काठमाडौं महानगर पालिकाले १ लाख ५० हजार प्रदान गर्ने छ भने बाँकी खर्च वडा नं. २४ ले बेहोर्ने छ।