बार्सिलोनाको सहज जित

एजेन्सी- लिग च्याम्पियन बार्सिलोनाले स्पेनिस ला लिगा फुटबलमा सहज जित निकालेको छ । आइतबार राति भएको खेलमा बार्सिलोनाले गेटाफेलाई २-० गोल अन्तरले पराजित गर्दै सहज जित निकालेको हो । घरेलु मैदानमा बार्सिलोनालाई जित दिलाउन अर्टुरो भिदालले एक गोल गरे भने एक गोल आत्मघाती उपहार पाएको थियो । 

खेलको ३९ औं मिनेटमा भिदालले गोल गर्दै बार्सिलोनालाई सुरुवाती अग्रता दिलाएका थिए । पहिलो हाफमा १-० को अग्रता लिएको बार्सिलोनाले दोस्रो हाफमा एक गोल आत्मघाती उपहार पाएको हो । 

खेलको ८९ औं मिनेटमा गेटाफेका डिज्ने डकोनामले आत्मघाती गोल गरेपछि बार्सिलोनाले २-० को जित निकालेको हो । यसअघि नै च्याम्पियन बनिसकेको बार्सिलोनाले ३७ खेलबाट ८६ अंक जोडेको छ । र, बार्सिलोनाले दोस्रो स्थानको एट्लेटिको मड्रिडमाथि ११ अंकको अग्रता कायम गरेको छ ।  

त्यस्तै दोस्रो स्थानको एट्लेटिकोले सेभियासँग १-१ गोलको बराबरी खेलेको छ । आइतबार राती भएको खेलमा एट्लेटिकोले सेभियासाग १-१ को बराबरी खेलेको हो । यस बराबरीसँगै एट्लेटिकोको ७५ अंक पुगेको छ ।