पैसा लिएर विदेश पठाउन नसकेपछि पत्नी र आठमहिने छोरीसहित आत्महत्या!

काठमाडौं- आठ महिनाकी छोरीसहित झापामा एक दम्पतीको शव घरभित्रै झुण्डिएको अवस्थामा फेला परेको छ। कनकाई नगरपालिका–१ मा आठमहिने छोरीसहित ३४ वर्षीय रविन विश्वकर्मा, उनकी श्रीमती २९ वर्षीया मुना विश्वकर्मा र ८ महिनाकी छोरी रुविना विश्वकर्माको शव भेटिएको जिल्ला प्रहरी कार्यालय झापाका डीएसपी राकेश थापाले जानकारी दिए।

रविन म्यान पावर एजेन्ट हुन्। थापाले भने, 'विदेश पठाइदिन्छु भनेर उनले धेरै जनासँग पैसा लिएका रहेछन्। तर विदेश पठाउन नसक्दा उनी तनावमा थिए भन्ने जानकारी आएको छ।' स्थानीय बासिन्दाले तीनै जनाले आत्महत्या गरेको जनाएका छन्। प्रहरीले भने घटनाबारे थप अनुसन्धान भइरहेको जनाएको छ। थापाले भने, 'स्थानीयले आत्महत्या भनेका छन्। शिशुसहित तीनै जनाको मृत्युका सम्बन्धमा हामीले अनुसन्धान गरिरहेका छौं।'

कन्काई नगरपालिका प्रमुख पोखरेलले  भित्रबाट चुकुल लगाएको अवस्थामा उनीहरूको शव फेला परेको जानकारी दिए। 'भित्रबाट चुकुल लगाएको अवस्थामा शव फेला परेको छ। कुन समयमा मृत्यु भएको हो थाहा छैन ', उनले भने।

कन्काई नगरपालिका प्रमुख पोखरेलले  भित्रबाट चुकुल लगाएको अवस्थामा उनीहरूको शव फेला परेको जानकारी दिए। 'भित्रबाट चुकुल लगाएको अवस्थामा शव फेला परेको छ। कुन समयमा मृत्यु भएको हो थाहा छैन ', उनले भने।

प्रहरीले पनि प्रारम्भिक अनुसन्धानका क्रममा उनीहरूले आत्महत्या गर्नुको कारण अर्काले लिएको पैसा तिर्न नसक्दा उत्पन्न तनाव रहेको हुन सक्ने जनाएको छ। रविन पनि विदेश जान भनेर केही समयअघि काठमाडाैं पुगेका थिए। तर पीसीआर परीक्षण गर्दा कोरोना पुष्टि भएपछि उनी जान पाएका थिएनन्। झापा फर्केपछि उनलाई धेरैतिरबाट पैसा तिर्न दबाब आइरहेको भन्ने जानकारी स्थानीयले दिएका छन्।