छोरी बलात्कार आरोपमा सेनाका पूर्वजमदार पक्राउ

विराटनगर– १४ वर्षीया आफ्नै छोरीलाई बलात्कार गरेको आरोपमा नेपाली सेनाका पूर्वजमदारलाई प्रहरीले पक्राउ गरेको छ।  

मोरङको बेलबारी ११ का ५१ वर्षीय पूर्वजमदारले छोरीमाथि बलात्कार गरेको भन्दै किटानी जाहेरी परेपछि शनिबार साँझ पक्राउ गरिएको मोरङ प्रहरीका प्रवक्ता डिएसपी दिपक श्रेष्ठले बताए। 

उनका अनुसार आरोपितलाई पक्राउ गरेर इलाका प्रहरी कार्यालय बेलबारीको हिरासतमा लिँदै घटनाका बारेमा थप बुझ्ने काम भइरहेको छ। ०७७ साल माघ २० गते राति आफ्नै घरमा धाकधम्की दिँदै डर देखाएर छोरीलाई बलात्कार गरेको आरोप पूर्वजमदारमाथि लगाइएको छ । 

पीडितको स्वास्थ्य परीक्षण लगायतका प्रक्रिया पनि अघि बढाइसकिएको डिएसपी श्रेष्ठले बताए। आरोपितविरुद्ध जबरजस्ती करणी मुद्दा चलाउन म्याद थप गरेर घटनाको बाँकी अनुसन्धान थालिने प्रहरीले जनाएको छ ।