दलित समुदायको माग बजेटमार्फत सम्बोधन हुन्छ : मन्त्री खड्का

बुटवल- लुम्बिनी प्रदेशका आर्थिक मामिला तथा योजना मन्त्री कृष्णध्वज खड्काले दलित समुदायलाई सम्बोधन गर्ने गरि गठबन्धनको सरकारले बजेट ल्याउने प्रतिबद्धता जनाएका छन्। डिग्नीटी इनिसियटिभ र अम्बेडकर सोसियल फाउण्डेशन लुम्बिनीले शुक्रबार बुटवलमा आयोजना गरेको कोरोनाले दलितलाई पारेको प्रभाव बिषयक अन्तरक्रिया कार्यक्रमलाई सम्बोधन गर्दै मन्त्री खड्काले पूर्ववर्ती सरकारले अध्यादेशमार्फत बजेट ल्याएको बताउँदै नयाँ सरकारले ल्याउने बजेटमा दलित समुदायको गुनासोलाई सम्बोधन गर्ने बताएका हुन्।

मन्त्री खड्काले कोरोना महामारीले आर्थिक रुपमा विपन्न समुदायलाई ठूलो असर पारेको बताउँदै त्यसबाट प्रभावित नागरिकलाई मध्यनजर गरि सरकारले बजेटलाई संशोधनसमेत गर्ने जनाए।

कार्यक्रममा अम्बेडकर सोसल फाउण्डेशन लुम्बिनीका अध्यक्ष विनोद पहाडीले दलित समुदायमाथि कोरोनाले आर्थिक र सामाजिक दुवै रुपमा असर पारेको बताउँदै अब बजेट र निति कार्यक्रममार्फत सम्बोधन गर्न आग्रह गरे। लुम्बिनी प्रदेशसभा सदस्य पुष्पा थरुनीले कोरोना महामारीले विपन्न, दलित तथा सिमान्तकृत समुदायलाई नै असर पार्ने भन्दै फेरी पनि सरकारले तयारीलाई मजबुद बनाउने बेला आइसकेको बताइन्।

उक्त अवसरमा कोभिड १९ ले दलित समुदायलाई पारेको असरबारे कार्यपत्र प्रस्तुत गर्दै लेखक तथा अनुसन्धानकर्ता जेवि विश्वकर्माले कोरोनाका कारण दलित समुदाय स्वास्थ्यसँगै आर्थिक, सामाजिक, शैक्षिक तथा विभेदबाट समेत प्रताडित भएकाले बिशेष प्याकेजमार्फत सम्बोधन गर्नुपर्ने बताए।