नेपाल बारको मतगणना सुरु

काठमाडौं - कानून व्यवसायीको छाता सङ्गठन नेपाल बार एशोसिएशनको नयाँ नेतृत्वका लागि भएको निर्वाचनको मतगणना सुरु भएको छ। बारको कार्यालयमा सोमबार साँझ ५ बजेदेखि मतगणना सुरु भएको प्रमुख निर्वाचन अधिकृत दामोदर खड्काले जानकारी दिए।

उनका अनुसार सोमबार पहिलो चरणमा विराटनगर उच्च बार, झापा र इलाम जिल्ला मतदान केन्द्रमा भएको निर्वाचनको मतगणना सुरु गरिएको छ। देशभरिबाट मतपेटिका काठमाडौं ल्याइसकेपछि मतगणना सुरु गरिएको हो। उनले तीन ठाउँको मतगणना सकिएपछि मंगलबार बिहान ९ बजेदेखि १० वटा स्थानमा मतगणना गर्ने जानकारी दिए।

२५ औं केन्द्रीय कार्यसमितिका लागि गत शनिबार बिहान ८ देखि अपराह्न ४ बजेसम्म देशभरिका ३५ मतदान केन्द्रमा निर्वाचन भएको थियो।

बारमा नयाँ नेतृत्वका लागि प्रगतिशील, पेशागत तथा समावेशी समूहबाट वरिष्ठ अधिवक्ता चण्डेश्वर श्रेष्ठ र बृहत् लोकतान्त्रिक समूहबाट सुनिलकुमार पोखरेलबीच प्रतिस्पर्धा भएको छ। तीन वर्षका लागि हुने कार्यसमितिमा एक अध्यक्ष, एक महासचिव, एक कोषाध्यक्ष, महिला उपाध्यक्ष एक र सातै प्रदेशबाट एक÷एक गरी आठ उपाध्यक्ष र १४ केन्द्रीय सदस्य निर्वाचित हुनेछन्।

निर्वाचनमा देशभर बारका १० हजार ३ सय १३ मतदातामध्ये आठ हजार ३ सय २९ मतदाताले मतदान गरेका थिए। निर्वाचन अधिकृत खड्काले चार दिनभित्र मतपरिमाण सार्वजनिक गर्ने बताए।रासस