कैलालीका प्रहरी प्रमुखलाई कारबाहीको माग 

कैलाली – जिल्ला प्रहरी कार्यालय कैलालीका प्रमुख प्रहरी उपरीक्षक आभुषण तिम्सिनालाई कारबाहीको माग भएको छ। सत्तापक्षकै विद्यार्थी संगठन र भातृ संगठनले प्रहरी उपरीक्षक तिम्सिनालाई कारबाहीको माग गरेका छन्।

प्रहरी उपरीक्षक तिम्सिनालाई भारतबाट २३ लाख चोरेर आएका बैतडीका नीरजवहादुर चन्दबाट १३ लाख असुल्दै छोडेको आरोप लागेपछि कारबाहीको माग गरिएको हो।

अखिल कैलालीका अध्यक्ष कुमार बडैला, अखिल (क्रान्तिकारी) का अध्यक्ष डम्मर भट्टराई, युवा संघका कैलाली सचिव राजु बम र वाईसीयलका कैलाली अध्यक्ष सुरज खातीले संयुक्त रुपमा विज्ञप्ति जारी गर्दै प्रहरी उपरीक्षक तिम्सिनालाई कारबाहीको माग गरेका हुन्।

प्रहरी उपरिक्षक तिम्सिना पदीय मर्यादा विपरित विभिन्न गतिविधिमा संग्लन रहेको भन्दै कारबाहीको माग गरिएको जारी विज्ञप्तिमा उल्लेख गरिएको छ। कैलाली प्रहरीलाई भारतबाट चोरेर ल्याएको १३ लाख असुल्दै चोरीमा संग्लन चन्दलाई छोडेको आरोप लाग्दै आएको छ।