मृतक परिवारलाई ३/३ लाख सहयोग गर्ने प्रदेश सरकारको घोषणा

जनकपुरधाम- हावाहुरीबाट बारा र पर्सामा ज्यान गुमाएका परिवारलाई जनही ३ लाख नगद आर्थिक सहयोग गर्ने घोषणा गरेको छ । सोमबार बिहान बसेको प्रदेश २ को मन्त्रिपरिषद्को आकस्मिक बैठकले यस्तो निर्णय गरेको हो ।

आइतबार राती एक्कासी तीव्र गतिमा आएको हावाहुरीमा परि हालसम्म ३५ जनाको ज्यान गएको प्रदेश सरकारले जनाएको छ । मृतक सबै परिवारलाई तत्काल ३÷३ लाख नगद आर्थिक सहयोग गर्ने निर्णय भएको आन्तरिक मामिला तथा कानुनमन्त्री एवं सरकारका प्रवक्ता ज्ञानेन्द्र यादवले जनाएका छन् ।

यसैगरी घाइतेहरुको उपचार खर्चको व्यवस्थासमेत प्रदेश सरकारले गर्ने मन्त्रिपरिषद् बैठकले निर्णय गरेको उनले बताए । यसका साथै हावाहुरीका कारण घरबारविहीन भएकाहरुका लागि खाना तथा लत्ताकपडाको व्यवस्थासमेत प्रदेश सरकारले गर्ने मन्त्री यादवले जानकारी दिए ।

आइतबार राती अचानक आएको हावहुरीका कारण बारा र पर्सा जिल्लामा पाँच सयभन्दा बढी स्थानीय घाइते भएका छन् । तीव्र हावाहुरीका कारण फुसका अधिकांश फुसका घरहरु भत्किएर सयौं परिवार विस्थापित भएका छन् । घाइतेहरुको उपचार वीरगंज, कलैयालगायतका अस्पतालहरुमा भइरहेको छ ।