कलेज क्रिकेट लिगमा ट्रिटन च्याम्पियन

काठमाडौं- काठमाडौंमा सम्पपन कलेज क्रिकेट लिग (सिसिएल) टी-२० क्रिकेटको उपाधी ट्रिटन कलेजले जितेको छ । आइतबार कीर्तिपुरसस्थित टीयू क्रिकेट मैदानमा भएको फाइनल खेलमा गोल्डेन गेटलजाई ५ विकेटले पराजति गर्दै सिसिएलको उपाधी ट्रिटनले जितेको हो । 

गोल्डेन गेटले दिएको १ सय २७ रनम लक्ष्य पछ्याएको ट्रिटनले १९.२ ओभरमा मात्र ५ विकेट गुमाउँदै उक्त लक्ष्य भेट्टायो । ट्रिटनको जितमा प्रदीप ऐरीले अविजित ४५ रन जोडे ।



यसअघि गोल्डेन गेटले पुरै २० ओभरमा ७ विकेट गुमाएर १ सय २६ रन बनाएको थियो । टस हारि पहिलो ब्याटिङ्ग गरेको गोल्डेन गेटले दिपेन्द्र सिँह ऐरिको अर्धसतको मद्दतमा १ सय २६ रन बनाएको थियो । जवाफमा प्रदिप ऐरिले अविजित ४५ र बिक्रम सोबले ६ बलमा महत्वपूर्ण १७ रनको इनिङ्गस खेलेपछि ट्रिटनले १९.२ ओभरमा ५ विकेटको क्षतिमा लक्ष्य प्राप्त गर्यो ।

सामान्य लक्ष्य पछ्याउने क्रममा ट्रिटनले १६ रनमै दुई विकेट गुमाएको थियो तर प्रदिपले आदिल खानसँग तेश्रो विकेटका लागि ६५ रनको महत्वपूर्ण साझेदारी गर्दै टिमलाई खेलमा कायम राखेका थिए । राष्ट्रिय टोलीमा भर्खरै प्रवेश गरेका अविनाश बोहोराले आदिल र बिनोद भण्डारीलाई ११ रनमा बोल्ड गरे भने किरण ठगुन्ना अमर सिँह रौटेलाको बलमा आउट भएपछि गोल्डेन गेट खेलमा फर्किएको थियो ।

अन्तिम ८ बलमा १५ रन चाहिएको अवस्थामा बिक्रमले १९ औं ओभरको अन्तिम दुई बलमा अविनाशलाई छक्का प्रहार गरेपछि ट्रिटनका लागि जित सहज बनेको थियो । प्रतियोगिताको विजेता टोली ट्रिटनले २ लाख २२ हजार २ सय २२ हात पार्यो । त्यस्तै उपविजेता बनेको गोल्डेन गेटले १ लाख ११ हजार १ सय ११ रुपैयाँ चित्त बुझायो ।