प्रदेश २ सरकारले माग्यो संघीय शिक्षामन्त्रीको राजीनामा

जनकपुरधाम-लगातार दोस्रोपटक माध्यमिक शिक्षा राजीनामासम्बन्धी समाचारमा माध्यमिक शिक्षा परीक्षा (एसइई)को प्रश्नपत्र बाहिरिएपछि प्रदेश २ सरकारले संघीय सरकारका शिक्षा मन्त्रीको राजनीनामा माग गरेको छ । एसइई सञ्चालन संघीय सरकार मातहत रहेको भन्दै प्रश्नपत्र बाहिरिने घटनामा संघीय सरकारले जिम्मा लिनुपर्ने प्रदेश सरकारको भनाइ छ । 

संघीय सरकारको निकायबाट प्रश्नपत्र बाहिरिएको भन्दै प्रदेश सरकारले संघीय शिक्षा मन्त्री गिरिराजमणि पोखरेलको राजीनामा माग गरेको हो । प्रदेश सरकारका आन्तरिक मामिला तथा कानुन मन्त्री ज्ञानेन्द्र यादवले प्रश्नपत्र बाहिरिने घटनामा प्रदेशको कुनै संलग्नता नरहेको दाबी गरेका छन् । 

शुक्रबार पत्रकार सम्मेलन गरेर संघीय सरकारका निकायहरुले प्रश्नपत्र बाहिर ल्याएको भन्दै यादवले संघीय सरकारका शिक्षा मन्त्रीले राजीनामा दिनुपर्ने माग गरे । 

‘हामीले प्रदेशका सबै जिल्ला प्रहरी कार्यालयमा सम्पर्क गरेका छौं,’ मन्त्री यादवले भने,‘प्रदेशबाट प्रश्नपत्र बाहिरिएको देखिएन् । प्रदेश सरकारलाई बदनाम गर्न माथिबाटै षडयन्त्र भए जस्तो छ ।’ ‘प्रदेशका सबै प्रहरी कार्यालयहरुबाट परीक्षा सुरु हुनु एक घन्टाअघिमात्र परीक्षा केन्द्रहरुमा प्रश्नपत्र पठाइएको छ,’ उनले भने, ‘तर प्रश्नपत्र राती नै बाहिरिएको छ । प्रदेशको कमजोरी देखिएको छैन् ।’

प्रश्नपत्र बाहिरिएको घटनासम्बन्धी छानबिन गर्न प्रदेश सरकारले समिति बनाइसकेको र सीआइबीले समेत अनुसन्धान गरिरहेको बताउँदै मन्त्री यादवले जो कोही दोषी भए कारबाहीको भागी बत्रुपर्ने बताए ।

बिहिबार विज्ञान र शुक्रबार सामाजिक अध्ययन विषयको प्रश्नपत्र परीक्षा अगाबै बाहिरिएपछि प्रदेश २ मा लगातार दोस्रो दिन परीक्षा रद्द भएको छ ।