एसईईको सामाजिक विषयको परीक्षा पनि स्थगित, १२ घण्टा पहिल्यै प्रश्‍नपत्र 'आउट'

जनकपुरधाम- प्रश्न पत्र आउट भएपछि माध्यमिक शिक्षा परीक्षा (एसइई) अन्तर्गतकाे सामाजिक शिक्षाको परिक्षा पनि स्थगित भएको छ ।  आज शुक्रबारका लागि तय भएको परीक्षा प्रश्न पत्र आउट भएपछि स्थगित गरिएकाे हाे । 

धनुषाबाट परीक्षा सुरु हुनुभन्दा १२ घण्टा अगाडी नै सामाजिक सञ्जाल फेसबुकमार्फत प्रश्नपत्र बाहिरिएपछि थियाे। परीक्षा प्रदेश २ मा र नियमित तर्फका विद्यार्थीको मात्रै स्थगित भएको प्रदेश २ को शिक्षा विकास निर्देशनालयले जनाएको छ । 

प्राविधिक र पुराना ग्रेडवृद्धिका लागि परिक्षा दिनेहरुको परीक्षा भने यथावत रहेको निर्देशनालयका निर्देशक रमाकान्त शर्माले जानकारी दिए । नियमित तर्फका विद्यार्थीहरुको समाजिक विषयको परीक्षा कहिले हुन्छ भनेर मिति भने तय गरिएको छैन । मिति तय गर्नका लागि शिक्षा अधिकारीहरु अहिले छलफलमा जुटेका छन् । 

प्रश्नपत्र बाहिरिएको विषयमा गम्भीर रुपमा अनुसन्धान गरिने निर्देशक शर्माले बताए । उनका अनुसार प्रश्नपत्र कसरी र कसले लिक गर्यो भन्ने विषयमा शुक्ष्म ढङ्गबाट अनुसन्धान गरिने छ । शिक्षाका कर्मचारीहरुबाटै प्रश्नपत्र बाहिरिएको आशंका गरिएको  छ। 

यसअघि विहिबार विज्ञान विषयको प्रश्नपत्र सप्तरीबाट बाहिरिएपछि प्रदेश २ मा परीक्षा रद्द भएको छ । रद्द भएको विज्ञान विषयको परीक्षा चैत २२ गते लिइने बताइएको छ ।

यसैबिच, परीक्षा स्थगित गरिएको विरोधमा जनकपुर र वीरगन्जमा विद्याथीहरु प्रदर्शनमा उत्रिएका छन् । ठाउँ ठाउँमा चक्काजाम गरेर उनीहरु विरोधमा उत्रिएका हुन् । 

जनकपुर ८ स्थित याज्ञबल्क परिक्षा केन्द्रमा परिक्षा रद्द भएको विरोधमा तोडफोड नै भएकाे छ । विद्यार्थीले अकस्मिक रुपमा परिक्षा रद्द गरेर दुःख दिएको भन्दै डेस्क बेन्च तोडफोड गरेको केन्द्राध्यक्ष सञ्जय झाले जानकारी दिए ।