भारतीय विदेश सचिवको काठमाडौं यात्रा : केके छन् एजेन्डा ?

काठमाडौं - भारतीय विदेश सचिव विजय केशव गोखले दुईदिने नेपाल भ्रमणका लागि बिहीबार बिहान काठमाडौं आइपुगेका छन्।

नेपालमा हुन लागेको लगानी सम्मेलनको पूर्वसन्ध्यामा आएका गोखलेले नेपालका समकक्षी शंकरदास बैरागीसँग भारतीय सहयोग तथा अनुदानमा सञ्चालित परियोजनाबारे छलफल गर्ने कार्यक्रम छ।

भारत नेपालको सबैभन्दा ठूलो निर्यातकर्ता देश हो। आर्थिक एवं सामाजिक जगतमा नेपालमा भारतको निकै प्रभाव रहिआएको छ। नेपालमा भोलिदेखि सुरु हुन लागेको लगानी सम्मेलनको अघिल्लो दिन आएका विदेश सचिव गोखलेको भ्रमणलाई रणनीतिक हिसाबले निकै महत्त्वका साथ हेरिएको छ।

दुई देशका सचिवबीच सीमा वारपार रेलवे विस्तार, आन्तरिक जलमार्ग, भूकम्पपछिको पुनर्निर्माण, अरुण तेस्रो परियोजनाबारे विस्तृत छलफल हुने परराष्ट्र अधिकारीले बताएका छन्।

यसैगरी पञ्चेश्वर बहुउद्देश्यीय परियोजना र माथिल्लो कर्णाली परियोजनाबारे पनि छलफल हुनेछ। विदेश सचिव भएपछि गोखले पहिलोपटक नेपाल आएका हुन्। दुई देश सचिवबीच नेपाल–भारतबीच यसअघि भएका नयाँ पुराना सबैखाले सम्झौताहरूको सहज ढंगले कार्यान्वयन भए नभएबारे समीक्षा हुनेछ। नेपाल–भारत संयुक्त पर्यवेक्षण संयन्त्रको कार्य प्रगतिबारे पनि छलफल हुनेछ।

काठमाडौंमा गत फरबरीमै हुने भनिएको दुई मुलुकका विदेश मन्त्रीस्तरीय संयुक्त आयोगको पन्ध्रौं बैठक हुन नसकेको बारे पनि छलफल हुनेछ।