सप्तकोशी नदीमा दुई महिनामा ६ जनाद्वारा आत्महत्या प्रयास

विराटनगर– पछिल्लो २ महिनामा सप्तकोशी नदीमा ६ जनाले आत्महत्याको प्रयास गरेका छन्। असार र साउनमा ६ जनाले सप्तकोशीमा हाम फालेर आत्महत्याको प्रयास गरेको सुनसरी प्रहरीका प्रमुख एसपी सञ्जयसिंह थापाले जानकारी दिए। नदीमा हामफालेर आत्महत्याको प्रयास गर्ने उनीहरूलाई प्रहरीले उद्धार गरेको छ। 

असार १ गते सुनसरीगढी गाउँपालिका-६ का ७८ वर्षीय वृद्धले आत्महत्या प्रयास गरेपछि उद्धार गरी प्रहरीले आफन्तलाई बुझाएको थियो। असार २१ गते विराटनगर महानगरपालिका-१० का ५५ वर्षीया महिला, साउन ४ गते विराटनगर–३ की ३५ वर्षीया महिलाले पनि आत्महत्या प्रयास गरेपछि उद्धार गरिएको हो।

साउन २० गते भारत मधुवनी जयनगर चित्रगुप्त कोलोनीका २५ वर्षीय युवा, साउन २४ गते सुनसरी इटहरी उपमहानगरपालिका–६ का ६५ वर्षीया महिला र काभ्रेपलान्चोक–१३ का ४० वर्षीया महिलाले आत्महत्याको प्रयास गरेको एसपी थापाले बताए। 

पारिवारिक समस्या तथा आर्थिक तनावका कारण आत्महत्याको प्रयास गर्ने गरेको पाइएको प्रहरीले जनाएको छ।  आत्महत्याको प्रयास गरिरहेको अवस्थामा प्रहरी चौकी कोसी ब्यारेजको टोलीले नदीबाट उद्धार गरी आफन्तलाई जिम्मा लगाउँदै आएको एसपी थापाले बताए। ‘प्रहरीले उद्धार गर्दा मलाई छाडिदिनुहोस्। म मर्न चाहन्छु समेत भन्ने गरेका छन्,’ उनले भने।