निर्मला हत्या प्रकरण : पूर्वएसपी विष्टलाई धरौटीमा छोड्न आदेश 

धनगढी–कञ्चनपुरकी १३ वर्षीया किशोरी निर्मला पन्तको हत्या प्रकरणमा यातना दिएको र प्रमाण नष्ट गरेको अभियोग लागेका तत्कालीन एसपी दिल्लीराज विष्टलाई धरौटीमा छोड्न आदेश भएको छ।

जिल्ला अदालत कंचनपुरले आइतबार उक्त आदेश दिएको हो। विष्टको थुनछेक बहस शुक्रबार नै सकिए पनि समय अभावका कारण आदेश आइतबार मात्र भएको हो। विष्टलाई प्रमाण नष्ट गरेको अभियोगमा साढे चार लाख र यातना दिएको अभियोगमा ६ लाख गरि साढे १० लाख धरौटीमा रिहा गर्न आदेश भएको जिल्ला अदालत कञ्चनपुरका श्रेस्तेदार हरिकृष्ण अवस्थीले जानकारी दिए।

गत मंगलबार बयानका लागि आफै अदालतमा उपस्थित भएका विष्टको बयानपछि बहस सुरु भएको थियो। पूर्व एसपी विष्टसहितका ८ जना विरुद्ध दीलिप विष्टलाई यातना दिएको र निर्मला हत्या प्रकरणको प्रमाण नष्ट गरेको भन्दै मुद्दा दायर भएको थियो। जिल्ला अदालत कञ्चनपुरले गत फागुन ३० गते उक्त मुद्दामा फैसना सुनाउँदै ६ जना प्रहरीलाई धरौटीमा रिहा गर्न आदेश दिएको थियो।अदालतको आदेशपछि ६ जना ३१ लाख धरौटीमा रिहा भइसकेका छन् भने सीआईबीका डीएसपी अंगुर जिसी भने अझै सम्पर्कमा आएका छैनन्।