आजका अखबार : उच्च नेताहरु निगरानीमा

काठमाडौं- राजधानीबाट प्रकाशित आइतबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् । 

आजको कान्तिपुर दैनिकले नेत्रविक्रम चन्द विप्लवसमुहका नेता हेमन्तप्रकाश वलीसहित ९ जनालाई पक्राउ गरेसँगै चन्द समुहका अन्य उच्च नेताहरुमाथि निगरानी बढाएको विषयलाई मुख्य समाचार बनाएको छ ।

प्रहरीले शुक्रबार राति विप्लवसमुहको तेस्रो वरियताका नेता वलीसहित विजय श्रेष्ठ, शंकर अधिकारी, धर्मराज राजबाहक, रामृष्ण खतिवडा, ललित लामा, सञ्जिव कार्की, वेद घिमिरे र लोकेन्द्र खड्कालाई पक्राउ गरेको थियो । फागुन १० गते नख्खुस्थित एनसेल कार्यालयमा विस्फोट गराएपछि सरकार विप्लव समुहप्रति आक्रामक बन्दै आएको छ । 

यस्तै कान्तिपुर यसै समाचारमा एक्लिए विश्वकर्मा उपशीर्षकमा खबर लेखेको  छ।

सरकारबाट गिरफ्तार भएपछि रिहाइका लागि उनले गरेका गतिविधिप्रति आशंका गरिएपछि उनलाई जिम्मेवारी विहिन बनाइएको समाचारमा जनाइएको छ । उनले रिहाइका लागि बाबुराम भट्टराईलाई गुहार्ने, सरकारसँग वार्ता गर्ने बताएको लगायतका कारण उनलाई विप्लव समुहले कारबाही गरेर एक्लाएको हो । 

यस्तै कान्तिपुरले मुलुकभर १८७० स्थानमा डढेलो लागेको र पौने पाँच  लाखले एसईई दिन लागेको विषयलाई पनि महत्वकासाथ छापेको छ । यस्तै तोकिएको भन्दा बढि रकम असुल्दै आएको विरगञ्जको नेसनल मेडिकल कलेजले विद्यार्थीसँग ब्याजसमेत असुल्ने गरेको कान्तिपुरले खुलासा गरेको  छ । 

आजको नागरिक दैनिकले भने अस्पतालमै जोखिम शीर्षकमा मुख्य समाचार छापेको छ ।

चिकित्सकको लापरबाहीले विरामीको ज्यान गएको गुनासो वारम्बार आइरहँदा पनि सेती अञ्चल अस्पताल प्रशासनले वेवास्ता गर्दा घटना दोहोरीँदै गएको समाचारमा उल्लेख छ । यस्तै विप्लव समुहका तेस्रो वरियताका नेता हेमन्तप्रकाश वलीसहित ९ जना पक्राउ परेको विषयलाई पनि नागरिकले महत्वका साथ छापेको छ ।

वविप्लवका तेस्रो वरीयताका नेता पक्राउ परेको र वीरगन्जमा स्वाइन फ्लुबाट एकजनाको मृत्यु भएको विषयलाई एङ्कर न्यूज बनाएको आजको अन्नपूर्ण पोस्ट्ले भने गुमनाम प्रदेश प्रमुख शीर्षकमा मुख्य समाचार छापेको छ ।

प्रदेश प्रमुख नियुक्तिका बेला उनीहरूको जति चर्चा थियो, त्यो अहिले छैन। प्रदेश प्रमुख नियुक्त हुनुअघि उनीहरू आआफ्नो क्षेत्रमा सक्रिय र परिचित थिए। पाँच वर्षका लागि नियुक्त प्रदेश प्रमुख पहिलो वर्षमै गुमनाम भएका छन्। सेरेमोनियल राष्ट्रपतिको भने सञ्चारमाध्यममा चर्चा भइरहन्छ। तर अधिकांश प्रदेश प्रमुखबारे आमनागरिक बेखबर बनेको समाचारमा उल्लेख छ । 

आजको नयाँ पत्रिकाले भने लगानी सम्मेलनमा ३९ खर्बका परियोजना शीर्षकमा मुख्य समाचार छापेको छ । यस्तै कांग्रेस केन्द्रीय समितिको निर्णयविरुद्ध जिल्लासभापतिहरुले भेला डाकेको विषयलाई एङ्कर न्यूज बनाएको छ ।