एनएमबि बैंकद्वारा भोटेकोशी बाढी प्रभावितका लागि ३ करोड ५१ लाख सहयोग

काठमाडौं- भोटेकोशी नदीमा आएको विनाशकारी बाढीबाट प्रभावित नागरिकहरूको उद्धार, राहत तथा पुनःस्थापनाका लागि एनएमबि बैंक लिमिटेडले ‘प्रधानमन्त्री दैवी प्रकोप उद्धार कोष’ मा ३ करोड ५१ लाख रुपैयाँ आर्थिक सहयोग प्रदान गरेको छ। उक्त सहयोग रकमको चेक बैंकको सञ्चालक समितिका अध्यक्षले अर्थमन्त्रीलाई औपचारिक रूपमा हस्तान्तरण गरेका हुन्।

नगद आर्थिक सहयोगका अतिरिक्त बैंकले प्रभावित क्षेत्रका बासिन्दाका लागि थप १० लाख रुपैयाँ बराबरको अत्यावश्यक राहत सामग्रीसमेत उपलब्ध गराएको जनाएको छ।

अचानक आएको भीषण बाढीका कारण रसुवा, नुवाकोट, धादिङ, गोरखा तथा चितवनलगायतका नदी तटीय क्षेत्रमा ठूलो मात्रामा जनधनको क्षति भएको छ। बाढीले सडक, जलविद्युत् आयोजना तथा स्थानीय पूर्वाधार तहसनहस बनाउनुका साथै सयौँ परिवार विस्थापित भएका छन्।

यस कठिन घडीमा सामाजिक उत्तरदायित्व वहन गर्दै प्रदान गरिएको यस सहयोगले बाढी प्रभावितहरूको उपचार, खाद्यान्न, अस्थायी आवास व्यवस्थापन तथा क्षतिग्रस्त संरचनाहरूको पुनर्निर्माण र पुनःस्थापनामा टेवा पुग्ने विश्वास बैंकले लिएको छ।