महिला श्रमिकमाथि दुर्व्यवहारको आरोपमा ट्राइकोट इन्डस्ट्रिजका प्रमुख पक्राउ

विराटनगर- तयारी कपडा उत्पादन गरी विदेश निर्यात गर्दै आएको ट्राइकोट इन्डस्ट्रिजका कार्यकारी प्रमुख सञ्जय चाण्डोक पक्राउ परेका छन्। महिला श्रमिकमाथि दुर्व्यवहार  गरेको आरोपमा कार्यकारी प्रमुख चाण्डोक पक्राउ परेका हुन्। 

मोरङका प्रहरी नायव उपरीक्षक डिएसपी दीपक श्रेष्ठले दुर्व्यवहारको आरोप लागेपछि कार्यकारी प्रमुख चाण्डोकलाई सोधपुछका लागि नियन्त्रणमा लिइएको बताए। उद्योगमै कार्यरत एक महिला कर्मचारीमाथि कार्यकारी प्रमुख चाण्डोकले दुर्व्यवहार गरेको आरोप छ। 

यता प्रमुख चाण्डोकमाथि कारबाहीको माग गर्दै उद्योगका मजदुर आन्दोलित भएका छन्। विराटनगर-१३ स्थित ट्राइकोट इन्डस्ट्रिज प्रालिका मजदुरले चाण्डोक कार्यकारी प्रमुख भएर आएपछि महिला श्रमिकमाथि दुर्व्यवहार हुन थालेको आरोप लगाएका छन्। 

करिब ३ वर्ष अघि चाण्डोक प्रमुख कार्यकारी अधिकृतको जिम्मेवारीमा आएका थिए। श्रमिक महिलाहरुलाई पटक–पटक दुर्व्यवहार गरेको भन्दै मजदुरले उद्योग परिसरमा नाराबाजी गरेका छन्। 

उद्योगका मजदुर पदर्शनमा उत्रिएपछि घटनास्थलमा जिल्ला प्रहरी कार्यालय मोरङ र इलाका प्रहरी कार्यालय रानीबाट प्रहरीको टोली पुगेको थियो। 

ट्राइकोटमा ३५० जना भन्दा बढी मजदुर कार्यरत छन्। त्यसमध्ये १५० जना महिला कामदार रहेको बताइएको छ।