बीपीको बाटो : संवाद, मेलमिलाप र संस्थाको विजय

बीपी कोइरालाले राजनीति केवल सत्ता प्राप्त गर्ने माध्यमका रूपमा कहिल्यै लिनुभएन। उहाँका लागि राजनीति राष्ट्र निर्माणको नैतिक दायित्व थियो। त्यसैले राष्ट्रिय मेलमिलापको नीति अघि सार्दै उहाँले एउटा गहिरो सन्देश दिनुभएको थियो- राष्ट्रको हित व्यक्तिगत वा गुटगत स्वार्थभन्दा ठूलो हुन्छ। लोकतन्त्रमा मतभेद स्वाभाविक हुन्छ। तर, मतभेदलाई संवादमार्फत साझा निष्कर्षमा पुर्‍याउने क्षमता नै संस्थाको परिपक्वताको मापन हो।

आज नेपाली कांग्रेस त्यही ऐतिहासिक जिम्मेवारीको मोडमा उभिएको छ। पार्टीभित्र विचारको विविधता रहनु कमजोरी होइन; त्यो लोकतान्त्रिक जीवनको प्रमाण हो। तर विचारको विविधता यदि अविश्वासमा रूपान्तरण भयो भने त्यसले संगठनलाई मात्र होइन, लोकतान्त्रिक संस्कृतिलाई पनि कमजोर बनाउँछ। त्यसैले कांग्रेसभित्र उत्पन्न हुने राजनीतिक प्रश्नहरूको समाधान पनि लोकतान्त्रिक संवाद, संस्थागत प्रक्रिया र आपसी विश्वासबाट खोजिनु नै बीपीको मार्गसँग मेल खाने बाटो हो।

नेपालको लोकतान्त्रिक इतिहासले एउटा स्पष्ट सन्देश दिएको छ- कांग्रेस बलियो हुँदा लोकतान्त्रिक शक्तिहरू बलियो भएका छन्, कांग्रेस कमजोर हुँदा लोकतान्त्रिक मूल्यहरू दबाबमा परेका छन्। त्यसैले कांग्रेसको एकता कुनै दलगत आवश्यकता मात्र होइन, यो राष्ट्रिय लोकतान्त्रिक स्थायित्वसँग जोडिएको प्रश्न हो।

आज देशका नागरिकले दलहरूबाट आरोप–प्रत्यारोपभन्दा समाधान, प्रतिस्पर्धाभन्दा सहकार्य र विभाजनभन्दा जिम्मेवार नेतृत्वको अपेक्षा गरेका छन्। यस्तो बेला कांग्रेसले आफ्नो गौरवशाली इतिहासबाट प्रेरणा लिँदै भविष्यतर्फ नयाँ आत्मविश्वासका साथ अघि बढ्नुपर्छ। त्यो यात्रा व्यक्तिको विजयबाट होइन, संस्थाको विजयबाट सम्भव हुन्छ।

यही विश्वासका साथ देशभर “देश र कांग्रेस जोड्ने अभियान” सुरु भएको छ। यसको मूल भावना कसैको पक्ष वा विपक्षमा उभिनु होइन; कांग्रेसको लोकतान्त्रिक आत्मालाई पुनः जागृत गर्नु हो। संवादलाई संस्कार, सहकार्यलाई शक्ति र एकतालाई संगठनको आधार बनाउने प्रयास नै यस अभियानको सार हो।

यस अभियानमा कांग्रेस भित्रका निस्कलंक नैतिकताको राजनीतिका पैरविकर्ता सक्रिय युवाहरू नेताहरु नैनसिंह महर, रञ्जित कर्ण लगायतले आफूलाई कुनै गुटको प्रतिनिधि होइन, संवादको सेतुका रूपमा प्रस्तुत गर्ने प्रयास गरेका छन्। उनीहरूको आग्रह सरल छ नेतृत्वबीच संवाद होस्, कार्यकर्ताको भावना सुनियोस्, र कांग्रेस आफ्नो ऐतिहासिक दायित्वअनुसार पुनः एकताबद्ध, सशक्त र जनविश्वासको केन्द्र बनोस्। यस्तो प्रयत्न सफल हुन देशभित्र मात्र होइन, विदेशमा रहेका सम्पूर्ण कांग्रेसजनको रचनात्मक साथ, सुझाव र सहभागिता पनि उत्तिकै आवश्यक छ। देश र कांग्रेस जोडने अभियानले यहि साउन २० गते कांग्रेस एकता राष्ट्रिय विमर्श भेला समेत सम्पन्न गरेर पुर्ण एकताको आवाज बुलन्द गरेर ,कांग्रेस जनमा हलचल ल्याएको छ ।

इतिहासले कांग्रेसलाई बारम्बार परीक्षा लिएको छ, र प्रत्येक कठिन मोडमा कांग्रेसले आत्मसमीक्षा, त्याग र एकताको माध्यमबाट नयाँ ऊर्जा प्राप्त गरेको छ। आज पनि त्यो अवसर हाम्रो सामु छ। हामीले व्यक्ति होइन, विचारलाई केन्द्रमा राख्नुपर्छ।हामीले गुट होइन, संगठनलाई बलियो बनाउनुपर्छ।हामीले तिक्तता होइन, विश्वासको वातावरण निर्माण गर्नुपर्छ। हामीले विगतको विवाद होइन, भविष्यको सम्भावनालाई रोज्नुपर्छ।

किनकि अन्ततः देश जोड्न कांग्रेस जोडिनुपर्छ।कांग्रेस जोड्न विश्वास जोडिनुपर्छ। विश्वास जोड्न बी.पी.को लोकतान्त्रिक संस्कार पुनर्जीवित हुनुपर्छ। यही “देश र कांग्रेस जोड्ने अभियान” को मर्म हो। यही नेपाली कांग्रेसको ऐतिहासिक जिम्मेवारी हो। र यही नेपालको लोकतान्त्रिक भविष्यलाई थप सुदृढ बनाउने सबैभन्दा विश्वसनीय बाटो पनि हो।