कांग्रेस नीति, अनुसन्धान तथा प्रशिक्षण प्रतिष्ठानको बैठक जेठ २७ गते बस्ने

काठमाडौं । नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानको चौथो बैठक आगामी जेठ २७ गते बस्ने भएको छ। ललितपुरको सानेपास्थित पार्टी केन्द्रीय कार्यालयमा जेठ २७ गते बुधबार बिहान ११ बजे बैठक आह्वान गरिएको हो।

कांग्रेसका कार्यवाहक मुख्य सचिव कृष्णप्रसाद दुलालले एक प्रेस विज्ञप्ति जारी गर्दै प्रतिष्ठानका सम्पूर्ण पदाधिकारी तथा सदस्यहरूलाई बैठकमा उपस्थितिका लागि अनुरोध गरेका छन्। बैठकमा पार्टीको आन्तरिक सुदृढीकरण, नीतिगत सुधार र आगामी सांगठनिक संरचनाका विषयमा महत्वपूर्ण छलफल हुने जनाइएको छ।

यस पटकको बैठकका लागि मुख्य चारवटा कार्यसूचीहरू तय गरिएका छन्। बैठकको सुरुमा विभिन्न उपसमितिका संयोजकहरूले आ-आफ्नो क्षेत्रको नीतिगत अवधारणा पत्र प्रस्तुत गर्ने कार्यक्रम रहेको छ। त्यसैगरी पार्टीलाई थप मर्यादित र अनुशासित बनाउने उद्देश्यका साथ तयार पारिएको प्रस्तावित आन्तरिक आचारसंहिता उपर विस्तृत छलफल र समीक्षा गरिनेछ।

प्रतिष्ठानको कामलाई थप व्यवस्थित र तीव्र रूपमा अगाडि बढाउन थप नयाँ उपसमितिहरू गठन गरी तिनीहरूको कार्यक्षेत्र र जिम्मेवारी निर्धारण गर्ने प्रस्ताव समेत बैठकमा लैजाने तयारी छ। बैठकको अन्तिम चरणमा देशको समसामयिक राजनीतिक परिस्थिति र अन्य विविध सांगठनिक विषयमा नेताहरूबीच समीक्षा हुने विज्ञप्तिमा उल्लेख छ।

नेपाली कांग्रेसले पार्टीका नीतिहरू तय गर्न, अनुसन्धानमूलक कार्य गर्न र नेता-कार्यकर्तालाई वैचारिक रूपमा प्रशिक्षित गर्न यो प्रतिष्ठानमार्फत काम गर्दै आएको छ।