ओली सरकारविरुद्ध अब कांग्रेस अदालत जाने

काठमाडौं- नेपाली कांग्रेस संवैधानिक परिषद्विरुद्ध अदालतमा जाने भएको छ । संवैधानिक परिषद्को गत माघ ६ गते बसेको बैठकमा प्रतिपक्षी दलका नेता एवम् सभापति शेरबहादुर देउवालाई जानकारी नै नगराई विभिन्न आयोगमा अध्यक्ष सिफारिस गरेको विरोधमा कांग्रेस अदालतमा जान लागेको हो ।

कांग्रेसको सोमबार जारी केन्द्रीय समिति बैठकले प्रतिपक्षी दलका नेताको उपस्थितिबिना नै आयोगहरूमा अध्यक्ष तोक्ने निर्णय गरेर सरकारले संविधानको ठाडो उल्लंघन गरेको निष्कर्ष निकालेको हो । यसबारे कानुनविद्हरूसँग परामर्श गरी अदालतमा जान लागिएको एक केन्द्रीय सदस्यले जानकारी दिए ।

परिषद् बैठक बस्नुभन्दा २४ घन्टा पहिले प्रतिपक्षी दलका नेतालाई चिठी काट्नुपर्ने कानुनी प्रावधान छ । तर प्रमुख प्रतिपक्षी दलका नेतालाई कुनै जानकारी नै नदिएको आरोप कांग्रेसले लगाएको छ । संसदीय सुनुवाइ समितिका सदइहरूले माग्दा पनि परिषद्ले चिठी उपलब्ध नगराएर सरकारले दम्भ देखाएको ठहर कांग्रेसको छ ।

परिषद् बैठकले विभिन्न आयोगहरूमा अध्यक्ष तोक्ने निर्णय गरेको थियो । चार सदस्यीय संवैधानिक परिषद्मा प्रमुख प्रतिपक्षी दलका नेता सदस्य हुने संवैधानिक प्रावधान छ ।

नेपालको संविधानको धारा २८४ उपधार १ (ङ) मा प्रतिपक्षी दलको नेता परिषद् सदस्य हुनुपर्ने व्यवस्था छ । बैठकबारे प्रतिपक्षी दलका नेतालाई ४८ घन्टाअघि नै सूचना दिनुपर्ने कानुनी व्यवस्था छ । बैठकले निर्णय गर्दा चार पटक सम्म सहमतिका लागि प्रयास गर्ने र नभएमा बहुमतको आधारमा निर्णय गर्ने व्यवस्था छ ।

बैठकका सम्बन्धमा प्रमुख प्रतिपक्षी दलका नेतालाई पठाइएको पत्रका सम्बन्धमा बुझ्न जाँदा परिषद् सचिवालयले उपलब्ध गराउन नसकेको कांग्रेसले जनाएको छ । ‘संवैधानिक परिषद्ले पत्र काटेको जानकारी दिनै मानेन ।  यसबारे हामी कानुनविद्सँग छलफल गर्नेछौं’, बैठकपछि प्रवक्ता विश्वप्रकाश शर्माले भने ।

बैठकमा बोल्ने सदस्यहरूले डा. गोविन्द केसीको जीवनरक्षाका लागि सशक्त कदम चाल्नुपर्ने धारणा राखेका थिए । यस्तै बूढीगण्डकी आयोजना गेजुवालाई दिँदा आर्थिक अनियमितता भएको, निजगढमा विमानस्थल बनाउने क्रममा धेरै रुख काट्न खोजेको र वाइड बडी खरिदमा भएको भ्रष्टाचारबारे नेताहरूले आआफ्ना धारणा राखेका थिए ।

बैठकले यिनै विषयमा आगामी २१ गते देशव्यापी रुपमा हुने विरोधसभा गर्ने निर्णय गरेको छ । बैठकमा केन्द्रीय सदस्य बद्री पाण्डेले राष्ट्रियसभा बैठकबारे जानकारी गराएका थिए । यस्तै गगन थापा, सुरेन्द्र पाण्डेलगायतका नेताहरूले सरकारको आलोचना गर्दै कांग्रेस सशक्त रूपमा अघि बढ्नुपर्ने धारणा राखेका थिए ।