थुनामुक्त भएको एक महिनापछि दिपक मनाङ्‍गेले लिए सपथ

काठमाडौं- एक महिना अघि थुनामुक्त भएका दिपक मनाङ्गे भन्ने राजीव गुरुङले निर्वाचित भएको १४ महिनापछि सपथ ग्रहण गरेका छन्।  पुस ५ गते थुनामुक्त भएका दीपक मनाङ्गे भन्ने राजीव गुरुङलाई सोमबार गण्डकी प्रदेशका प्रदेशसभा सभामुख नेत्र अधिकारीले सपथ ग्रहण गराएका हुन्। 

सपथ लगत्तै सभामुखले टीका लगाइदिए र उपसभामुख सिर्जना, प्रदेश सरकारका भौतिक पूर्वाधारमन्त्री रामशरण बस्नेत, आन्तरिक मामिला तथा कानूनमन्त्री हरिबहादुर चुमानले हात मिलाएर बधाइ दिएका थिए।

मनाङे मनाङको प्रदेशसभा ख बाट निर्वाचित भएका हुन्। स्वतन्त्र उम्मेदवार बनेका उनलाई वाम गठबन्धनले समर्थन गरेको थियो। 

सर्वोच्च अदालतले थुनामुक्त गर्न आदेश दिएपछि उनलाई डिल्लीबजार कारागारले पुस ५ मा थुनामुक्त गरेको थियो। प्रदेशसभा निर्वाचनमा मनाङबाट विजयीसमेत भएका मनाङ्गे ज्यान मार्ने उद्योगसम्बन्धी मुद्दामा डिल्लीबजार कारागारमा कैद सजाय भुक्तान गरिरहेका थिए।

तर, ज्यान मार्ने उद्योगसम्बन्धी पुरानो मुद्दामा सर्वोच्चले गरेको फैसलाका कारण सपथ लिन पाएका थिएनन्। उनले करिब ८ महिना जेल बसे।