प्रदेश १ को संसद् अधिवेशन अन्य गर्न सिफारिस, सभामुखले भने– मलाई थाहा छैन

विराटनगर– प्रदेश १ मन्त्रिपरिषद्को बैठकले प्रदेशसभाको चालू अधिवेशन सोमबार राती १२ बजेदेखि अन्त्य गर्न सिफारिस गरेको छ ।

मन्त्रिपरिषद्को बैठकले प्रदेशसभाको आठौं तथा बजेट अधिवेशन अन्य गर्न प्रदेश प्रमुख सोमनाथ अधिकारी प्यासी समक्ष सिफारिस गरेको हो ।

प्रदेश १ का आन्तरिक मामिला तथा कानूनमन्त्री हिक्मतकुमार कार्कीले सदन चलाउने उर्जा सांसदहरुमै नदेखिएकोले अन्त्य गरिएको बताए । प्रदेशसभाका सभामुख प्रदीपकुमार भण्डारीसँग परामर्श नगरी संसदको अधिवेशन अन्य गरेको पाइएको छ । सभामुख भण्डारीले सोमबार बसेको प्रदेशसभा बैठक मंगलबार  १ बजे बस्ने गरी स्थगित भएको थियो ।

सभामुख प्रदीपकुमार भण्डारीले भने आफूलाई सदन अन्त्य भएको कुरा थाहा नभएको बताए । सञ्चारमाध्यममा समाचार आएपछि आफुले थाहा पाएको भण्डारीले बताए । 

प्रदेश १ सरकारले सभामुखसँग सामान्य परामर्शसमेत नगरी प्रदेशसभाको आठौं तथा बजेट अधिवेशन अन्त्य गरेपछि विपक्षी दलहरुले विरोध गरेका छन् ।

प्रमुख प्रतिपक्ष दल नेपाली कांग्रेस संसदीय दलका नेता राजीव कोइरालाले सरकारले सत्तामा संकट आएको अनुभूति गरेको हुनसक्ने बताए । सरकारले सत्तामा संकट आएको अनुभूति गरेर यस्तो निर्णय लिएको हुनसक्ने उनले बताए ।

नेकपा माओवादी केन्द्रका संसदीय दलका नेता इन्द्रबहादुर आङ्बोले सत्ता संरक्षणका निमित्त षड्यन्त्रपूर्वक सदन अन्त्य गरेको भन्दै विरोध गरेका छन् । मुख्यमन्त्रीले दलहरुसँग छलफल र त्यसका लागि तदारुकतासमेत नदेखाएको भन्दै अधिवेशन अन्त्यको उनले विरोध गरे ।