कोदो प्रवर्द्धनका लागि राष्ट्रिय कोदो दिवसः कृषिमन्त्री अधिकारी

पाटन । कृषि तथा पशुपन्छी विकासमन्त्री रामनाथ अधिकारीले कोदोको प्रवर्द्धनका लागि प्रथम राष्ट्रिय कोदो दिवस घोषणा गरी मनाउन सुरुवात गरिएको बताएका छन्।

नेपाली कांग्रेसको व्यावसायिक सीप विकास विभागको आयोजना पार्टीको केन्द्रीय कार्यालयमा आज आयोजित प्रथम राष्ट्रिय कोदो दिवस कार्यक्रममा उनले पहिले गरिबले खाने भनेर चिनिएको कोदो अहिले धनीको खानामा परिणत भएको बताए।

उनले भने, 'धनीले खाने भनेर चिनिएको धान दिवस मनाउन हुने तर गरिबले खाने भनिएको कोदो दिवस किन नमनाउने भनेर राष्ट्रिय कोदो दिवस मनाउने निर्णय सरकारले गरेको हो।'

उनले कोदो उत्पादनका लागि रासायनिक मल प्रयोग गर्नुनपर्ने उल्लेख गरेका छन्। मन्त्री अधिकारीले कोदोको परिकार स्वास्थ्यका लागि लाभदायक रहेको बताए।

उनले हिमालमा पाइने याकको संरक्षणका लागि याक दिवस र पहाडमा पाइने कोदोको प्रवर्द्धनका लागि कोदो दिवसको सुरुआत गरेको बताउँदै नेपाली कांग्रेसको नेतृत्वमा भएको असल अभ्यासका रूपमा यी दुवै कार्यहरूको पहिचान कायम रहने धारणा राखे।

पार्टीका केन्द्रीय कोषाध्यक्ष उमेश श्रेष्ठले ६५ प्रतिशतभन्दा बढी न्यून आय भएका नागरिक कृषि पेसामा सहभागी भएकाले कृषि क्षेत्रमा धेरै सम्भावना भएको बताए।

विभागका संयोजक डा गङ्गालक्ष्मी अवालले कृषि क्षेत्रको समुचित विकास, आधुनिकीकरण र व्यावसायिक विकास नै देशको आर्थिक समृद्धिको आधार भएको बताए।

उनले कृषि व्यवसायमा निर्भर रहेका अन्नदाता किसानको सम्मान गर्न सक्नुपर्नेमा जोड दिए। ‘कोदोका लागि भविष्य, भविष्यका लागि कोदो’ भन्ने नाराका साथ यस वर्षको कोदो दिवस मनाइएको हो। यसअघि साउन १५ गते कोदो दिवस मनाउँदै आइएको थियो। यसवर्ष सरकारले प्रथम राष्ट्रिय कोदो दिवस भनेर साउन १६ गते मनाउने घोषणा गरेको हो।