होटलमा आगो लाग्दा १४ जनाको मृत्यु

कोलकाताको एउटा होटलमा आगलागी हुँदा १४ जनाको मृत्यु भएको छ।

कोलकाताका प्रहरी आयुक्त मनोज कुमार वर्माले शहरको सबैभन्दा व्यस्त बुर्राबजार क्षेत्रको एक होटलमा आगलागी हुँदा १४ जनाको मृत्यु भएको पुष्टि गरेका बीबीसीले जनाएको छ।

केही समयअघि पत्रकारहरूसँग कुरा गर्दै उनले आगलागीको कारण पत्ता लगाउन टोली गठन गरिएको बताएका थिए। पहिलो नजरमा आगो बिजुलीको मिटर नजिकै लागेको देखिन्छ।
आगो नियन्त्रणमा ल्याइएको छ। दमकल र उद्धारकर्मीहरूले करिब एक दर्जन मानिसहरूलाई बाहिर निकालेका छन्।

यो क्षेत्र शहरको सबैभन्दा ठूलो फलफूल बजारको बीचमा पर्छ। प्रहरी आयुक्तले मंगलबार राति ८:१५ बजे मछुवा क्षेत्रमा रहेको ऋतुराज होटलमा आगलागी भएको बताए। आगो नियन्त्रणमा ल्याइएको छ। उद्धार कार्य सम्पन्न भएको छ।

समाचार एजेन्सी पीटीआईका अनुसार प्रत्यक्षदर्शीहरूले आगोबाट बच्न धेरै मानिसहरू झ्यालबाट भाग्न खोजिरहेको देखेको बताएका छन्। चौथो तलाबाट हाम फाल्ने प्रयास गर्दा दुई जना घाइते भएका छन्।