गभर्नर बन्न नबिलबाट बाहिरिए ढुंगाना, कामु सीईओमा मनोज ज्ञवाली

काठमाडौं- नबिल बैंकको कायम मुकायम प्रमुख कार्यकारी अधिकृत (सीईओ)को जिम्मेवारी मनोज ज्ञवालीले पाएका छन्।

सीईओ ज्ञानेन्द्र ढुंगानाको राजीनामा स्वीकृत भएसँगै ज्ञवालीले कामु सीईओको जिम्मा पाएका हुन्।

आज बसेको बैंकको सञ्चालक समितिको बैठकले ढुंगानाको राजीनामा स्वीकृत गर्दै वरिष्ठ नायब प्रमुख कार्यकारी अधिकृत रहेका ज्ञवालीलाई कामु सीईओको जिम्मेवारी दिएको हो।

ढुंगानाले १० गतेदेखि लागु हुने गरी राजीनामा दिएका थिए। उनले गभर्नरका लागि प्रतिस्पर्धा गर्न राजीनामा दिएका हुन्। सरकारले राष्ट्र बैंकको गभर्नर नियुक्तिका लागि हालै सिफारिस समिति गठन गरेको छ।