सुर्खेतमा गर्जिए लिङ्‍देन- अब नारायणहिटी खाली गर

राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले केपी शर्मा ओली, शेरबहादुर देउवाहरूकै कारण देश बर्बाद बनेको बताएका छन्। उनीहरूकै कारण देश दुर्घटनामा जान थालेकाले बचाउनका लागि राजसंस्था अपरिहार्य रहेको उनले तर्क गरे।

मंगलबार सुर्खेतको वीरेन्द्रनगरमा आयोजित खबरदारी सभामा बोल्दै उनले भने, ‘अहिले जुन अवस्थाबाट हामी गुज्रेका छौँ, यसबाट देश बन्ने कुनै कल्पना गर्न सकिन्न । त्यसैले अब सोच्ने बेला आयो ‌।’

कर तिर्न पनि घूस खुवाउनुपर्ने अवस्था आएकाले यी दलहरूकै कारण संसारकै भ्रष्ट मुलुक बनेको आरोप उनले लगाए। ३५ वर्षसम्म नबनेको देश केपी, देउवालाई अब बाँचुन्जेल जिम्मा दिए पनि बन्न नसक्ने लिङ्देनले बताए। उनले भने, ‘यिनीहरूले देशमा गणतन्त्रको नाममा लुटतन्त्र मच्चाइरहेका छन्। अब अभिभावकका रूपमा राजसंस्था आवश्यक बन्यो ।’

राप्रपा नेतृ कुन्ती शाहीले दलहरूलाई नारायणहिटी खाली गर्न चेतावनी दिइन्। ‘गणतन्त्र, संघीयता र धर्मनिरपेक्षतावादीलाई भन्न चाहन्छु, तिम्रो यो तन्त्रमा जनता खुसी हुन सकेनन्, देश बन्न सकेन। जनताको मनोभावना अनुसार तपाईँहरू सच्चिनुस्, देश लुट्न जनताले छुट दिने हैन,’ उनले भनिन्।

राप्रपाका प्रमुख सचेतक ज्ञानेन्द्र शाहीले अहिलेको राष्ट्रपति कांग्रेसको मात्र भएकोले देशको अभिभावकका रूपमा राजा आवश्यक रहेको बताए ।