सतुंगलको कपास उद्योगमा भिषण आगलागी, दश घण्टापछि नियन्त्रणमा

काठमाडौं- चन्द्रगिरी नगरपालिका ११ सतुंगलमा रहेको कपास उद्योगमा लागेको आगो दश घण्टापछि नियन्त्रणमा आएको छ । 

बिहीबार साझ ७ बजे लागेको आगो शुक्रबार बिहान ५ बजे मात्रै नियन्त्रणमा आएको छ । आगो नियन्त्रणमा लिन आठ वटा दमकल र ३० वटा पानी ट्याङकर परिचालन गरिएको थियो । प्रहरी, सशस्त्र प्रहरी, नेपाली सेनाको टोली समेत आगो नियन्त्रणमा खटिएको थियो ।
 
आगो निभाउने क्रम समयमै सुरु भएपनि कपासमा लागेको आगो निभाउन कठिन भएको प्रहरीले जनाएको छ। आगो कपास उद्योग नजिकै रहेको आल्मुनियम काराखानामा पनि सल्किएको थियो । विद्युत सर्ट भएर आगलागी भएको बताइएपनि कारणका विषयमा थप अनुसन्धान भइरहेको प्रहरीले जनाएको छ । 

आगलागीबाट कपास उद्योग र आल्मुनियम कारखाना पूर्ण रुपमा जलेर नष्ट भएको छ । क्षतिको विवरण संकलन गर्ने काम भइरहेकाले कतिको क्षति भयो भन्न कठिन भएको आगो नियन्त्रणमा खटिका प्रहरी निरिक्षक शंखर खड्काले जानकारी दिए ।