'सरकारले राजनीतिलाई राज्य दोहनको माध्यम बनायो'

काठमाडौं- नेपाल वायुसेवा निगमका दुई वटा वाइड बडी विमान खरिदबारे अध्ययन गर्न गठित संसदीय छानबिन उपसमितिले ४ अर्ब ३५ करोड ५६ लाख रुपैयाँ अनियमितता भएको ठहर गरेको समाचारप्रति विवेकशील साझा पार्टीको गम्भीर ध्यानाकर्षण भएको छ।

संसदीय छानबिन उपसमितिले दोषी औंल्याएका सबैलाई तत्काल उनीहरूको कार्यभारबाट मुक्त गरी निष्पक्ष कानुनी र न्यायिक प्रक्रिया पारदर्शी रूपमा यथाशीघ्र अघि बढाउन नेपाल सरकारसँग विवेकशील साझा पार्टीले माग गरेको छ।

‘सार्वजनिक खरिद प्रक्रियामा बारम्बार भ्रष्टाचार हुनुले हाम्रो राज्य प्रणाली भ्रष्टाचारको चरम विकृतिले थलिएको स्पष्ट रूपमा देखिन्छ। अझ भ्रष्टाचारलाई वैधता दिने गरी नीति र कानुनको तहमा जानीबुझी छिद्र राखेर गरिने कैयौं नीतिगत भ्रष्टाचारका विषय त सार्वजनिक समेत हुँदैनन्,’ विवेकशीलले जारी गरेको विज्ञप्तिमा भनिएको छ, ‘राजनीतिलाई राज्य दोहनको माध्यम बनाउने पारम्पारिक राजनीतिक अभ्यास नै यो समस्याको मूल कारण हो। 

यो विकृतिलाई जरैदेखि उखेल्न आमजनता, नागरिक समाज, राजनीतिक दल लगायत समग्र समाजले आ-आफ्नो ठाउँबाट गम्भीर र सार्थक पहल गर्नका लागि हाम्रो पार्टी आह्वान गर्दछ।’