आजका अखबार : प्रधानमन्‍त्रीले वाइडबडीको रौँ-रौँ केलाउने !

काठमाडौं- राजधानीबाट प्रकाशित बिहीबारका राष्ट्रिय दैनिक अखबारहरुले वाइडबडी खरिदमा ४ अर्ब ३५ करोड अनियमितता भएको विषयलाई मुख्य समाचार बनाएका छन् । 

सार्वजनिक लेखासमिति अन्तर्गतको उपसमितिले गरेको छानविनका क्रममा ४ अर्ब ३५ करोड ५६ लाख अनियमितता भएको पत्ता लगाएको हो ।

छानविन उपसमितिले वाइडबडी घोटाला प्रकरणमा पर्यटनमन्त्री रवीन्द्र अधिकारीसहित सात जनालाई मुख्य दोषि देखाएको छ । जसमा दुईजना पूर्व  पर्यटनमन्त्री, दुई जना सचिव, एकजना पूर्व सचिव र नेपालवायु सेवा निगमका महाप्रवन्धक सुगतरत्न कंसाकार रहेका छन् । 

यसैविषयलाई मुख्य समाचार बनाउँदै कान्तिपुर दैनिकले वाइडबडीबारे संसदीय उपसमितिको ठहरः ४ अर्ब ३५ करोड अनियमितता शीर्षकमा खबर छापेको छ । अन्नपूर्ण पोस्ट्ले सवा ४ अर्ब नोक्सान ठहरः मन्त्री, सचिव र कर्मचारीलाई कारबाही सिफासि शीर्षकमा खबर लेखेको छ ।

अन्नपूर्णले पर्यटनमन्त्री रवीन्द्र अधिकारीसँग प्रतिकृया समेत लिएको छ । मन्त्री अधिकारीले प्रतिवेदन जुन ढंगले आएको छ, त्यसमा अचम्मित छु भनेर प्रतिक्रिया दिएका छन् । 

आजको नयाँ पत्रिकाले भने प्रधानमन्त्री  केपीशर्मा ओलीले वाइडबडी घोटाला काण्डको रौँ रौँ चिर्ने भनि दिएको प्रतिक्रयालाई प्राथमिकताका साथ छापेको छ । एयरबस प्रकरणमा प्रधानमन्त्रीः रौँ-चिरा केलाइन्छ, पहरो गर्जिए गर्जियोस् शीर्षकमा खबर प्रकाशित छ । उनले सम्पूर्ण कुरा बाहिर आउने गरि घटनाका विषमा जरैदेखि अध्ययन गर्ने प्रतिवद्धता जनाएको समाचारमा उल्लेख छ । 

यसैगरि नयाँ पत्रिकाले गोविन्दराज जोशीको भ्रष्टाचारको मुद्दा सर्वोच्चमा ४४ पटक पेसी सरेको विषयलाई मुख्य समाचार बनाएको छ । गोपाल पराजुली, दीपकराज जोशी, कल्याण श्रेष्ठ र सुशीला कार्कीलाई पनि जोशीको मुद्दा हेर्ने फुर्सद नभएको समाचारमा उल्लेख छ । 

आजको नागरिक दैनिकले भने मुलुकमा लगानीको वातावरण नबनेको र नवनियुक्त प्रधानन्यायाधीश चोलेन्द्रशम्शेर राणाले वरिष्ठ न्यायाधीश दीपकराज जोशीको पेसी खोसेको विषयलाई मुख्य समाचार बनाएको छ । जोशीका विषयमा राणा कठोर बनेर प्रस्तुत भएका छन् । उनले सिधैँ जोशीलाई अब मुद्दा हेर्न दिन नसकिने बताएका छन् ।