बेतका फर्निचरबाट मासिक ५० हजार आम्दानी

धरान- इटहरी उपमहानगरपालिका-७ का ६२ वर्षीय राजकुमार श्रेष्ठले विगत २१ वर्षदेखि बेतका फर्निचर बनाएर जीवन गुजारा गरिरहेका छन्। परिश्रमी उनले भारतको सिलगुडीबाट बेत ल्याएर फर्निचर बनाउँदै आएका छन्।

उनले भने,  'बेतका सामान बनाउने र बिक्री गर्दै आएको २२ वर्ष भयो। फर्निचर महँगो भए पनि यसको बजार छ। इटहरी, तरहरा र मोरङको पथरीसम्म बिक्री गर्दै आएको छु, ती स्थानमा मात्र बिक्री गर्दा खर्च कटाएर मासिक ५० हजारसम्म बचाउन सकिन्छ।'

बेतबाट बनेका डोका, डाला, नाङ्लो मुढा, कोक्रोलगायत फर्निचरमा ग्राहकको आकर्षण बढिरहेको छ। उनले भने, 'बेतको फर्निचर आकर्षक र टिकाउ भएकाले ग्राहकको रोजाइमा आफ्ना उत्पादन परेका छन्।' उनले सजावटका सामान पनि बनाउन थालेका छन्। ती सामानको उच्च माग रहेकाले आफू त्यसमा नै बढी व्यस्त हुने गरेको बताए। हाल उनको पसलमा १२ प्रकारका बेतका सामान बिक्रीमा छन्।

बेतबाट बनेका सजावटका सामान सात सयदेखि १६ हजार रुपैयाँसम्ममा बिक्री हुने गरेका छन्। सिलगुडीबाट एक बण्डल बेतलाई तीन हजार पाँच सय पर्ने गरेका छन्। एक बण्डल बेतबाट पाँचवटासम्म सामान बनाउन  सकिने भएकाले आफूलाई घाटा नभएको उनले बताए।

राजकुमारजस्तै धरान-९ का पर्शु तामाङले पनि बेतका सामग्री बेचेर मनग्ये आम्दानी गरेका छन्। एघार वर्षदेखि बेतका फर्निचर बनाउँदै आभएका उनले मासिक ८० हजार रुपैयाँसम्म आम्दानी हुने गरेको बताए।

उनले कोक्रो, सोफा, डाइनिङ टेबल, कुर्सी, मुढा, ह्यांगर, धाकी, गमला र्याकलगायत सामान बनाउने गरेका छन्। उनले भने, 'बेतको सामान बनाउन जोकोहीले सक्दैनन्, त्यसैले भारतीय कालीगढ राखेर काम गरिरहेको छु, बिक्रीको समस्या छैन। बेतको सामान १० देखि २५ वर्षसम्म प्रयोग गर्न सकिन्छ।' 

हातमा सीप भए रोजगारीका लागि विदेशिनु नपर्ने तथा स्वदेशमै व्यवसाय गर्न उनले युवापुस्तालाई प्रेरित गर्नुपर्नेमा जोड दिए। रासस