एकैदिन एक हजार बढेर सुनको मूल्यमा उच्च रेकर्ड

काठमाडौं- प्रतितोला एक हजार रूपैयाँले बढेर बुधबार नेपाली बजारमा सुन हालसम्मकै उच्च बिन्दुमा पुगेको छ।

यो साता आइतबार प्रतितोला एक हजार दुईसय रूपैयाँले घटेर सोमबार र मंगलबार सामान्य वृद्धि भएको सुनको मूल्य बुधबार पनि उकालो लाग्दै प्रतितोला एक लाख ५३ हजार चारसय रूपैयाँ पुगेको छ।

यसअघि गएको शुक्रबार सुन हालसम्मकै उच्च प्रतितोला एक लाख ५३ हजार तीनसय रूपैयाँमा कारोबार भएको थियो। यो साता बुधबार पुन: सुनको मूल्यले नयाँ रेकर्ड कायम गरेको हो।

चाँदीको मूल्य पनि लगातार वृद्धि भइरहेको छ। सोमबार र मंगलबार दुई दिनमा प्रतितोला १५ रूपैयाँले बढेको चाँदीको मूल्य बुधबार तोलामा १५ रूपैयाँले बढेर प्रतितोला एक हजार ७ सय ८० रूपैयाँ कायम भएको छ।