संसद् बैठकका १४ कार्यसूची: नीति तथा कार्यक्रम पारित गर्नेदेखि आर्थिक सर्वेक्षणसम्म

काठमाडौं- प्रतिनिधि सभाको आगामी बैठक भोलि (आइतबार) बिहान ११ बजे बस्ने कार्यक्रम छ। सहकारी ठगी प्रकरणले संसद्‍मा चलिरहेको गतिरोधका बीचमा भोलिको बैठकमा सरकारले नीति तथा कार्यक्रम पारित गर्नेदेखि आगामी आर्थिक वर्षको आर्थिक सर्वेक्षण पेश गर्ने तयारी गरेको छ।

संघीय संसद् सचिवालयको बैठकको सम्भावित कार्यसूची जारी गरिसकेको छ, जसमा १४ वटा सम्भावित कार्यहरू उल्लेख छ।

प्रधानमन्त्री तथा मन्त्रिपरिषद्को कार्यालयबाट प्राप्त पत्रहरू सुनाउने, दोस्रोमा प्रतिनिधिसभा नियमावली २०७९ को नियम १० बमोजिम बैठकको अध्यक्षता गर्ने मनोनयन गर्ने, त्यसपछि सुरक्षित मुद्रण सम्बन्धी विधेयकबारे शिक्षा, स्वास्थ्य तथा सूचना प्रविधि समितिको प्रतिवेदन पेश गर्ने, केही नेपाल ऐन संशोधन गर्ने अध्यादेश अस्वीकृत गर्न सांसद प्रेम सुवाले सूचना राख्ने, उद्योगमन्त्री दामोदर भण्डारीले लगानी सहजीकरण सम्बन्धी केही नेपाल ऐनलाई संशोधन गर्न बनेको अध्यादेश प्रस्तुत गर्ने कार्यसूचीमा समावेश छन्।

यस्तै त्यसपछिको कार्यसूचीमा अर्थमन्त्री वर्षमान पुनले आगामी आर्थिक वर्षको आर्थिक सर्वेक्षण पेश गर्ने कार्यक्रम राखिएको छ। त्यसपछि चारवटा विधेयकमाथि विभागीय मन्त्रीहरूले प्रस्तावहरू पेश गर्नेछन्। भने ११ देखि १४ नम्बरसम्मका कार्यसूची नीति तथा कार्यक्रममाथि केन्द्रित छन्।

नेपाली कांग्रेसलगायत विपक्षी दलहरू भने संसदीय छानबिन समिति नबने संसद् चल्न नदिने अडानमा छन्। सभामुख देवराज घिमिरेले भने पछिल्ला बैठकहरूमा प्रतिपक्षलाई पेलेरै संसद् चलाइरहेका छन्।