आजका अखबार : ठेकेदार भाग्‍न खोजेपछि मेलम्ची ठप्प

काठमाडौं- राजधानिबाट प्रकाशित मंगलबारका अधिकांश राष्ट्रिय दैनिक अखबारहरुले मेलम्ची खानेपानी आयोजनाको काम ठप्प भएको विषयलाई प्रमुख समाचार बनाएका छन् । 

इटालीएन ठेकेदार कम्पनी सिएमसीले आफू आर्थिक रुपमा टाट पल्टिएको दाबी गर्दै काम छाडेपछि बहुप्रतिक्षित मेलम्ची खानेपानी आयोजनाको काम ठप्प भएको छ । योसँगै अबकाे ४६ दिन भित्र निर्माण सकि मेलम्चीको पानी काठमाडौं ल्याउने पूर्वघोषित लक्ष्य अन्योलमा परेको छ । 

यसै विषयलाई मुख्य समाचार बनाउँदै आजको नयाँ पत्रिकाले इटालीमा ठेकेदार जोखिममा, नेपालमा मेलम्ची अन्योलमा शीर्षकमा खबर छापेको छ । उसले काम अलपत्र छाडेर इटाली फर्किन थालेका ठेकेदार कम्पनीका म्यानेजरसहित ८ जनाको पासपोर्ट जफत गरेको पनि समाचारमा उल्लेख गरेको छ  ।

आजको कान्तिपुरले मेलम्ची ठप्प शीर्षकमा खबर लेखेको छ भने नागरिक दैनिकले मेलम्ची विवाद सतहमा शीर्षकमा खबर छापेको छ । सरकार र ठेकेदार कम्पनी सिएमसीबीच लामो समयदेखि क्षतिपूर्ती विवाद चल्दै आएको र सोही कारण काम नै ठप्प भएको पत्रपत्रिकामा उल्लेख छ । 

यो विषय बाहेक आजका अखबारहरुले नेकपाको जारी स्थायी समिति बैठकमा प्रधानमन्त्री तथा पार्टी अध्यक्ष ओलीविरुद्ध नेताहरु आक्रमक बनेको विषयलाई पनि प्राथमिकता साथ प्रकाशित गरेका छन् ।

कान्तिपुरले ओलीमाथि चर्को आक्रोश शिर्षकमा मुख्य समाचार छापेको छ भने नागरिक दैनिकले सरकार र पार्टी सञ्चालन पद्धतिको आलोचना शीर्षकमा खबर लेखेको छ । नयाँ पत्रिकाले बैठकमा वामदेव झन उग्र बनेको विषयलाई महत्वका साथ प्रकाशित गरेको छ । 

सोमबारको बैठकमा अध्यक्षको प्रतिवेदनमाथि जवाफ दिदै नेता वामदेव गौतमले संविधानमा भएदेखि दुइटा प्रधानमन्त्री हुन्थ्यौं भनेर मजाक गर्ने ? तपाईसँग दुई तिहाइ छ, संविधान संसोधन गरेर दुइटै प्रधानमन्त्री राख्ने प्रावधान बनाउनुस भनेर आक्रोश पोखेका थिए ।

अध्यक्ष ओलीले आइतबार मात्रै प्रचण्डतर्फ संकेत गर्दै मिले दुबैजना प्रधानमन्त्री बन्ने थियौ भनेर बताएका थिए । वामदेवले भने एकजना अध्यक्ष र एकजना प्रधानमन्त्री बन्नु पर्ने प्रस्ताव स्थायी समितिमा पेश गरेका थिए । 

यस्तै आजका पत्रपत्रिकाले कांग्रेसमा पदाधिकारी थप्न सभापति शेरबहादुर देउवा लचक बनेको, राष्ट्रपति, उपराष्ट्रपति र प्रधानमन्त्रीका लागि ल्याइएको हेलिकप्टर खरिद प्रक्रिया नै त्रुटिपूर्ण रहेको विषयलाई महत्वका साथ छापेका छन् ।