एमालेको नेपाल पक्षले भन्यो– अध्यक्ष ओलीले नैतिकताका आधारमा राजीनामा दिनुपर्छ

बुटवल– नेकपा एमालेको माधवकुमार नेपाल पक्षले पार्टी एकता कायम गर्न नसकेको भन्दै पार्टी अध्यक्ष केपी ओलीको राजीनामा मागेको छ। उक्त समूहले नैतिकताको आधारमा ओलीले राजीनामा दिनुपर्ने केन्द्रीय कमिटीलाई सुझाव दिएको छ। 

नेपाल पक्षको रुपन्देही जिलल कमिटीको प्रथम बैठकले पार्टी अध्यक्ष ओलीलाई राजीनामा दिएर पार्टी एकता कायम गर्न सुझाव दिएको हो। दुई दुुई पटक प्रतिनिधिसभा विघटन गरेको, नेकपा विभाजन र एमाले भित्र एकता कायम गर्न नसकेकोले पार्टी एकताका लागि नैतिकताका आधारमा राजीनामा दिन केन्द्रीय कमिटीलाई सुझाव दिने निर्णय गरिएको नेकपा एमाले रुपन्देहीका अध्यक्ष राजु गुरुङले बताए। 

बैठकले पार्टी सदस्यता नवीकरण र पार्टी सदस्य आवेदन भदौ मसान्तसम्म सम्पन्न गर्न मातहतका कमिटीलाई निर्देशन गरेको छ। यसैगरी बैठकले जिम्मेवारी विभाजन पनि गरेको छ। भदौ १५ भित्र पालिकास्तर जनवर्गीय संगठनको कमिटी निर्माण, भदौ मसान्तसम्म शाखा तहको कमिटी गठन र पुनर्गठन अघि बढाउने निर्णय गरेको नेकपा एमाले उपसचिव सिद्धि भट्टराईले बताए। 

बैठकलाई सम्बोधन गर्दै पोलिटब्युरो सदस्य डा. विजय पौडेलले अध्यक्ष ओलीकै कारण पार्टी एकता पर धेकिलिएको बताए। उनले दुई दुई पटकसम्म प्रतिनिधिसभा विघटन गर्नु र नेकपाभित्र विधि पद्धति मिचेको भन्दै बैठकमा आत्मालोचना गरेर गल्ती महसुस गरेमा पार्टी एकता जोगिने बताए। तर, ओली यसमा तयार नभएको उनको आरोप छ। 

बैठकमा प्रदेशसभा सदस्य बिष्णु पन्थी, अर्का सदस्य रमा घर्ति, केन्द्रीय सल्लाहकार रामचन्द्र भट्टराई , प्रदेश कमिटी सदस्य नन्दीकेशर ढकाल, नेताहरु छत्र ब खत्री, डा. बालकृष्ण चापागाईको उपस्थिती थियो।