रोहितको शतकमा वेस्ट इन्डिज 'ए' विरुद्ध नेपाल विजयी

पाँच खेलको टी–२० शृङ्खलाको पहिलो खेलमा नेपालले वेस्ट इन्डिज ‘ए’ लाई पराजित गरेको छ। शनिबार त्रिवि खेल मैदानमा भएको खेलमा नेपाल ४ विकेटले विजयी बनेको हो।

नेपालसामु वेस्ट इन्डिजले जितका लागि २०५ रनको लक्ष्य प्रस्तुत गरेको थियो। नेपालले १९.४ ओभरमा ६ विकेटको क्षतिमा उक्त लक्ष्य भेट्टायो।

नेपालका लागि कप्तान रोहित पौडेलले शानदार शतकीय पारी खेले। उनले सर्वाधिक १ सय १२ रन बनाए। उनले ५४ बलमा १० चौका र ६ छक्का हिर्काए।

दीपेन्द्र सिंह ऐरीले १८ बलमा २४ रनको योगदान दिए। उनले यस क्रममा २ चौका र १ छक्का हाने। कुशल भुर्तेल र कुशल मल्लले १६–१६ रन बनाए। 

गुल्सन झाले दुई चौका हानेर टोलीलाई जितसम्म डोर्‍याए। यसअघि टस हारेर पहिले ब्याटिङ गरेको वेस्ट इन्डिजले निर्धारित २० ओभरमा ५ विकेटको क्षतिमा २०४ रन बनाएको थियो। 

शृङ्खलाको दोस्रो खेल आइतबार खेलिने छ भने तेस्रो खेल मे १ तारिखमा हुनेछ। चौथो खेल मे २ तारिखमा र पाँचौँ खेल मे ४ तारिखमा खेलिने छ।