मनाङमाथि दबाब बढाउने थ्रीस्टारको लक्ष्य

काठमाडौं- पल्सर सहिद स्मारक ‘ए’ डिभिजन लिग अन्तर्गत शनिबार दुई खेल हुँदैछन् । दुवै खेल हल्चोकस्थित एपिएफको खेले मैदानमा हुदैछन् ।

पहिलो खेलमा बिहान ११ बजे च्यासल युवा क्लबले ब्रिगेड ब्वाइज क्लबविरुद्ध भिड्दै छ । लिगको शीर्ष ४ स्थानमा पुग्ने लक्ष्य लिएको च्यासलले पछिल्लो समय राम्रो नतिजा हात पारेको छ । 

क्लबले विदेशी फरवार्ड एल्भिसलाई पनि क्लबमा सामेल गरेको छ । सन्तोष साहुखल र पछिल्लो खेलमा २ गोल गरेका सन्त बहादुर गुरुङले अग्रपंक्ति सम्हाल्ने छन् । ब्रिगेड ब्वाइज भने लिगमा दोस्रो जितको खोजीमा छ ।

दोस्रो खेल दिउँसो २:३० बजे लिग उपाधिको दौडमा रहेको रुस्लान थ्री स्टार र मछिन्द्र क्लबबीच प्रतिस्पर्धा हुनेछ । मछिन्द्रले हालसम्म लिगमा एक गोल पनि गर्न सकेको छैन । सुरुवाती दुई खेलमा च्यासल र पुलिसलाई गोलरहित बराबरीमा रोकेको मछिन्द्रले त्यसयता एक खेल बराबरी खेलेको छ ।

थ्री स्टारले पछिल्लो समय लगातार जित दर्ता गर्दै आइरहेको छ । तेस्रो चरणमा मनाङसँग पराजित भएयता थ्री स्टार क्लबले लगातार ४ जित दर्ता गरिसकेको छ । शीर्ष स्थानमा मनाङलाई दबाबमा राख्न टोलीले जित हासिल गर्नु पर्ने अवस्था छ । 

७ खेलमा १८ अंक जोडेको थ्री स्टार संकटा भन्दा ३ अंक र मनाङभन्दा ६ अंक पछाडी छ । यद्यपी अगाडिका क्लबले १ खेल बढी खेलेका छन् । थ्री स्टारले जित दर्ता गरे संकटासँग बराबरी हुनेछ ।