काठमाडौंको लक्ष्य प्ले अफ, चितवनलाई जित्नै पर्ने दबाब

काठमाडौं- एभरेष्ट प्रिमियर लिग (इपीएल) टी-२० क्रिकेटमा शनिबार भैरहवा ग्लाडीयटर्सविरुद्ध काठमाडौं किङ्स इलाभेन र चितवन टाइगर्सविरुद्ध पोखरा राइनोज भिड्दै छन् । त्रिवि क्रिकेटमा मैदानमा शनिबार हुने पहिलो खेलमा बिहान ९ बजे भैरहवा र काठमाडौंबीच प्रतिस्पर्धा हुने छ ।

काठमाडौंविरुद्ध मैदान उत्रदा भैरहवा लगातार चौथो जितको खोजीमा हुनेछ । दुई खेल अगावै प्ले अफमा पुगेको भैरहवा जित निकाल्दै शीर्ष दुई स्थानमा रहने प्रयासमा हुनेछ । दोस्रो स्थानमा रहेको भैरहवाले ३ खेलबाट ६ अंक जोडेको छ ।

यता, काठमाडौं भैरहवालाई हराएर आफ्नो प्ले अफ सुरक्षित गर्न चाहन्छ । तीन खेलबाट ४ अंक जोडेर काठमाडौं चौथो स्थानमा छ । भैरहवालाई हराएमा काठमाडौंको प्ले अफ सम्भावना बलियो हुनेछ । तर, यदि पराजित भएको खण्डमा काठमाडौंको प्ले अफ सम्भावनाका लागि अर्को खेलको नतिजा पर्खिनु पर्ने छ । 

त्यस्तै शनिबार हुने दोस्रो खेलमा चितवन र पोखराबीच अपरान्ह १ बजे प्रतिस्पर्धा हुने छ । यो खेल चितवनका लागि महत्वपूर्ण रहेको छ ।  चितवनलाई प्ले अफको सम्भावना कायम राख्न यस खेल जित्नै पर्ने दबाब छ । 

चितवनले ४ खेलबाट २ अंक जोडेको छ । चितवनको यो अन्तिम खेल हो  ।  यता, पोखराका लागि यस खेल प्रतिष्ठाको लडाई मात्र हुनेछ । तर, पोखरालाई पहिलो जित निकाल्ने अवसर भने रहेको छ  । अघिल्ला चार खेल गुमाएर प्ले अफबाट बाहिरिएको पोखराले अंक जोड्न सकेको छैन  ।