वीरगंज रक्सौल प्रशारण लाइन निर्माणको काम अन्तिम चरणमा

वीरगंज- महानगरको दक्षिणी क्षेत्रमा नियमित विद्युत् आपूर्तिको  लागी निर्माणाधीन ३३ केभिए वीरगंज रक्सौल प्रशारण लाइन निर्माणको काम अन्तिम चरणमा पुगेको छ। भारतको रक्सौलबाट छपकैयाँस्थित विधुत प्राधिकरणको सब स्टेशनमा ३३ केभिए प्रशारण क्षमताको प्रशारण लाइन निर्माण भइरहेको हो ।

प्रशारण लाइनबाट १० मेगावाट विद्युत् आयात गरिनेछ । यो प्रशारण लाइनको संचालन पछि महानगरको केही वडा कम्तीमा १५ वर्षको लागी लोडसेडिङको समस्याबाट मुक्त हुने प्राधिकरणको वीरगंज वितरण केन्द्रका प्रमुख मुनिन्द्र ठाकुरले जानकारी दिए ।

नेपालमा पर्याप्त मात्रामा विधुत उत्पादन हुँदा र बिहारमा विधुतीय उर्जा संकट रहेको बेला वर्षौदेखि वीरगंज हुँदै यो प्रशारण लाइनबाट विधुत निर्यात हुनेगरेको थियो ।नेपालमा उर्जा संकट शुरु भएयता विधुत निर्यात ठप्प रहेको छ।

छपकैयाँ सबस्टेशनबाट ३३ केभिएको विद्युत् प्रसारणको लागि नेपाल विद्युत् प्राधिकरणले पाँच वर्ष पहिले तयारी गरेको थियो ।  सब स्टेशनको जग्गामा विवाद भएर अदालती प्रक्रियामा समय लागेकोले निर्माणमा  लामो समय अवरोध भएको  वितरण केन्द्र प्रमुख ठाकुरले बताए ।

भारतबाट आयातित विधुत ३३ केभिए प्रशारण लाइन निर्माणमा ढिलाई हुँदा भारतीय विधुत कलैया र पोखरिया पठाउने काम भइरहेको थियो ।

प्राधिकरणले महानगरको घना आवादी भएको बस्तीबाट प्रशारण लाइन लैजान भूमिगत तार ओछ्याएको छ। महानगरले निर्माण गरेको कालोपत्रे   सडक भत्काउन प्राधिकरणले छतिपूर्तीवापत ६८ लाख रुपैयाँ महानगर लाई भुक्तानी गरेको छ। 

यसअघि २१ करोड रुपैयाँ लगानीमा रक्सौल परवानीपुर १३२ केभिए प्रशारण लाइन गत वर्ष नै निर्माण सम्पन्न भएको थियो । १३२ केभिए प्रशारण लाइनबाट प्राधिकरणले ५० मेगावाट विद्युत् आयात गरिरहेको छ।